Një ngjarje e rëndë u regjistrua të martën në lagjen “13 Shtatori” të qytetit të Beratit, ku një punëtor 47-vjeçar ka humbur jetën pasi është zënë poshtë nga një masiv shkëmbor.
Ngjarja ka ndodhur gjatë kohës kur po zhvilloheshin punime në një subjekt privat në zonën e Kalasë.
Lidhur me këtë rast policia ka njoftuar se pas verifikimeve të kryera ka arrestuar në flagrancë investitoren e objektit. V.S. 45-vjeçe, ndërsa ka shpallur në kërkim administratorin dhe drejtuesen teknike të firmës që kryente rikonstruksionin.
Sipas hetimeve 47-vjeçari e ka humbur jetën si pasojë e shkeljes së rregullave të mbrojtjes në punë. Gjithashtu, rezulton se këta 3 shtetas kanë tentuar të pengojnë zbulimin e së vërtetës, duke fshehur identitetin e shtetasve përgjegjës për punimet.
Njoftimi i policisë
Në vijim të informacionit të dhënë ditën e djeshme, për shtetasin G. S., i cili humbi jetën gjatë punës për rikonstruksionin e një objekti në lagjen “13 Shtatori”, ku e zuri poshtë një masiv guri që u shkëput nga zona e kalasë, informojmë se Komisariati i Policisë Berat kreu të gjitha veprimet procedurale për rastin.
Në përfundim të tyre arrestoi në flagrancë investitoren e objektit, shtetasen V. S., 45 vjeçe, si dhe shpalli në kërkim administratorin dhe drejtuesen teknike të firmës së ndërtimit që kryente rikonstruksionin, përkatësisht shtetasin Ç. H., 53 vjeç dhe shtetasen I. Ç., 41 vjeçe.
Nga hetimet e deritanishme rezulton se shtetasi G. S. punonte i paregjistruar në organet tatimore.
Vijon puna për kapjen e 2 shtetasve të shpallur në kërkim.
i.b./dita
