Erion Veliaj deklaroi sot se përballë ndodhet “tangoja e belasë”, ku njëri është ‘Non Grata’ dhe tjetri financohet nga rusët. Në një takim elektoral, Veliaj tha se kundërshtarët politikë janë njerëz që kanë problemet dhe hallet e tyre dhe jo hallet e njerëzve.
“Kemi një kundërshtar, njërën që financohet nga rusët. Ky është një gabim i pafalshëm. Të jesh kryetare partie, si Monika Kryemadhi, dhe të vijnë para nga rusët çdo muaj dhe të thuash që është rastësi, ky është një gabim i pafalshëm në vitin 2023. Ti nuk mund të hash bukën e Amerikës dhe të bësh duvanë e rusëve; ti nuk mund të thuash që je pro Perëndimit, e ndërkohë të financohesh nga rusët. Sali Berisha sot është ‘non grata’. Këta të dy po bëjnë një tango të belasë. Janë të dy në hall, njëri ka dalë sigurims i Shtetit, fuksi i lagjes, ai 20 lekëshi që spiunonte shokët për antena e për të gjithë pakënaqësitë, i cili është bërë bashkë me ish-komunistin më të poshtër. Thoshte Vaslav Havel: Ndoshta komunistët janë të këqinj, por e di kush janë më të poshtrit? Ish-komunistët që sillen sikur janë antikomunistë. Ky është Saliu me Ilirin”, përfundoi Veliaj.
Kandidati i PS-së për Tiranën, Erion Veliaj tha se ka vetëm një parti me program të qartë për kryeqytetin, e cila ka një udhëheqës, Edi Ramën, ka vetëm një logo dhe ajo është Partia Socialiste e Shqipërisë. Ndërsa, për kundërshtarët politikë, ai shtoi se s’dinë cilin kanë udhëheqës.
