Në 8 maj të këtij viti dy bashkëshortë holandezë u futën për të notuar në kanionet e lumit Osum. Për fat të keq njërin prej tyre e mori rrjedha. Gruaja e tij 64-vjeçare u gjet dhe u shpëtua nga ekipi i mirënjohur i rafting që e ushtron këtë sport në Osum, prej dekadash.
Kreu i Federatës së Rafting, Zamo Spathara, osumolog, njohës i kanioneve të Osumit me centimetra, i dha personalisht gruas ndihmën e parë, më pas e dërgoi në spitalin e Çorovodës dhe asistoi kurimin e saj.
Më pas, Spathara, ndihmoi edhe gjetjen e trupit të të ndjerit, pasi grupi i polumbarëve të RENEA po e kërkonte prej tre ditësh.
Gruaja, së cilës, shpejtësia dhe profesionalizmi i grupit të djemve të Spatharës i shpëtoi jetën, tashmë është kthyer në Holandë, ku familja i ka dhënë lamtumirën e fundit bashkëshortit dhe babait 68 vjeçar.
Por sot në adresën e ekipit të rafting në Berat, ka ardhur nga Holanda një letër dhe një pako vërtetë prekëse. Pakoja me disa ushqime tradicionale dhe letra e mbushur me falënderime është dërguar nga fëmijët e çiftit holandez, dy vajzat dhe djali.
Për më shumë ndiqni në këtë video të botuar nga DITA, momentin kur Zamo Spathara dhe ekspertja e njohur e turizmit Alma Spathara hapin pakon dhe letrën: