Dalin pamje të tjera filmike të arrestimit të Jamarbër Malltezit.
Siç shihet nga kjo video e kamerave të sigurisë në aeroportin e Rinasit, tre oficerë të policisë pa uniformë, iu afruan Jamarbër Malltezit në zonën e jashtme të aeroportit, në pjesë e hyrjes kryesore. Në momentin e arrestimit Malltezit, siç duket edhe në video, mbante në kokë kapelen e tij ekuadoriane.
Sipas disa raportimeve, Malltezi ishte duke u larguar nga vendi, të tjera raportime thonë se po priste në Rinas bashkëshorten e tij që kthehej nga Gjermania.
Jamarbër Malltezi u arrestua të shtunën në mbrëmje nën akuzat për korrupsion dhe pastrim parash pas hetimeve disavjeçare lidhur me privatizimin e ish- Kompleksit Sportiv Partizani.
Për Malltezin u kërkua arrest me burg. Ndaj vjehrrit të tij, Sali Berisha, Gjykata e Posaçme kundër Krimit dhe Korrupsionit vendosi si masë sigurie detyrimin për paraqitje pranë policisë gjyqësore si dhe ndalim të udhëtimeve jashtë vendit.
Në pranga përfundoi edhe ortaku i Malltezit në ndërtimet që pasuan privatizimin e kompleksit sportiv.
