Një shpërthim i fuqishëm ka ndodhur mëngjesin e sotëm në karburantin “EiDA”, në zonën e Bërrylit në Tiranë, duke shkaktuar plagosjen e tre punonjësve dhe dëme të konsiderueshme materiale.
Mësohet se shpërthimi ka ardhur si pasojë e një bombole gazi në ambientet e karburantit, ku furnizohen automjetet me gaz. Për pasojë, një ngrehinë 1 katëshe është shembur, ndërsa tre punonjës të karburantit kanë mbetur të plagosur.
Në momentin e shpërthimit, në karburant ndodhej një automjet që po furnizohej me gaz. Ende nuk dihet nëse ka pasur persona të tjerë të përfshirë apo të dëmtuar nga shpërthimi.
Tre punonjësit e plagosur janë transportuar në spital, ku po marrin ndihmë mjekësore. Gjendja e tyre shëndetësore nuk është bërë ende e ditur.
Shpërthimi ka shkaktuar panik në zonën e Bërrylit, ndërsa dëmet në godinën e karburantit janë të dukshme.
Në vendngjarje kanë mbërritur shërbimet e emergjencës dhe autoritetet, të cilat po punojnë për zbardhjen e plotë të rrethanave dhe shkakut të shpërthimit.
Njoftimi i Policisë:
Tiranë/Informacion paraprak. Tek “Brryli”, në një karburant, dyshohet se ka shpërthyer një bombul gazi, gjatë kohës që po furnizohej me karburant një automjet. Si pasojë, janë dëmtuar 3 persona, punonjës të karburantit, të cilët janë dërguar në spital për mjekim, jashtë rrezikut për jetën. Grupi hetimor vijon punën për sqarimin e rrethanave të rastit.
j.l./ dita
