Moti i keq me reshje shiu dhe erë të fortë ka shkaktuar incident në portin e Durrësit, ku trageti “Claudia” i linjës Durrës-Ankona ka hasur në vështirësi gjatë qëndrimit në basenin portual.
Trageti është spostuar nga kalata duke krijuar probleme te sigurisë dhe për mjetet e tjera në Port.
Vetëm në 30 minuta, situata u normalizua falë reagimit të menjëhershëm të autoriteteve, pilotëve, rimorkiatorëve dhe ekuipazhit të tragetit. Imbarkimi i pasagjerëve po vijon normalisht.
Drejtoria e Përgjithshme Detare ka dhënë detaje mbi incidentin që ndodhi pasditen e së dielës në portin e Durrësit.
“Sot në orën 18:21 në portin e Durrësit ka ndodhur një incident. Si rezultat i erës fortë që shkoi 35 m/s në port, trageti A/F CLAUDIA ka këputur cimën e djathtë dhe ka prekur bankinën nga ana e ish-portit te peshkimit.
Menjëherë kanë hyrë në veprim dy rimorkiatorët të cilët kanë shmangur përplasjet dhe trageti CLAUDIA është lidhur përsëri në bankine me cima te tjera.
Theksojmë se trageti A/F Claudia nuk ka pasur të imbarkuar pasagjerë dhe automjete në çastin e incidentit. Pas lidhjes dhe mbajtjes me dy rimorkiatorë ka filluar puna për imbarkimin e mjeteve në traget.
Njoftojmë se në këto çaste trageti A/F Claudia ka dalë nga porti Durrësit dhe është nisur për Ankona. Gjithashtu të gjithë pasagjerët që do udhëtojnë sonte me linjat Durrës – Bari dhe Bari – Durrës së tragetet do vazhdojnë normalisht në linjat sipas orareve të përcaktuara në grafik,”-thuhet në njoftim.
m.b./dita
