Policia ka dhënë detaje në lidhje me arrestimin e një personi këtë të mërkurë në doganën e Kapshticës, pasi tentoi të trafikonte 9.3 kg kanabis në Greqi.
Nga pamjet e publikuara, shihet se 49-vjeçari Romi Tarusha, e kishte fshehur lëndën narkotike në automjetin që drejtonte tip “Benz”, në pjesën e bagazhit, tek bombola e gazit.
Kanabisi ishte i mbështjellë dhe i ndarë në 9 pako.
“Si rezultat i operacionit të kryer nga specialistët e Seksionit për Hetimin e Narkotikëve të DVP Korçë u bë arrestimi në flagrancë i shtetasit:
-R. T., 49 vjeç, banues në fshatin Drenovë, Korçë. Bazuar në analizën e riskut dhe në kontrollet me përzgjedhje, në dalje të Republikës së Shqipërisë, Policia Kufitare ka kaluar në vijën e dytë, për kontroll më të imtësishëm, automjetin tip “Benz”, me drejtues shtetasin R. T. Gjatë kontrollit të detajuar, në pjesën e bagazhit, tek bombola e gazit u gjetën dhe u sekuestruan në cilësinë e provës materiale 9 pako me lëndë të dyshuar narkotike cannabis sativa, me peshë totale 9.3 kilogramë, sasi të cilën 49-vjeçari synonte t’a trafikonte në drejtim të Greqisë“, thuhet në njoftimin e policisë.
Në bashkëpunim me Prokurorinë, po vijojnë hetimet për dokumentimin e plotë të këtij rasti dhe për vënien përpara përgjegjësisë ligjore të shtetasve të tjerë të implikuar në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
