Hetimet për vrasjen e Ardian Nikulajt kanë përfunduar ditën e sotme në Lezhë. Mësohet se Prokuroria e Lezhës ka kopsitur dosjen ndaj portugezit Ruben Saraiva dhe e ka dërguar për gjykim në Gjykatën e Lezhës. Savaiva akuzohet nga prokuroria e Lezhës për ‘vrasje për gjakmarrje’ dhe ‘armëmbajtje pa leje’. Ndërkohë që ende pritet nga Britania e Madhe ekstradimi i 4 britanikëve që morën pjesë në ngjarje.
Ardian Nikulaj u vra më 19 prill 2023 brenda lokalit të tij në Shëngjin. Porositës dhe organizator dyshohet se është Edmond Haxhia i cili ka rënë në pranga, së bashku me tre britanikë Thomas Mithan, Steve Hunt dhe Harriet Bridgeman. Të katër këta janë prangosur, pasi autoritetet britanike kanë pranuar si të ligjshme kërkesën e bërë nga Policia e Shtetit.
Portugezi Ruben Saraiva u largua nga Shqipëria përmes Doganës së Kapshticës, bashkë me britanikun Harry Simson, në drejtim të Greqisë. Ai u ekstradua në Shqipëri me 31 dhjetor të vitit 2023, pas vendimit të Gjykatës së Marokut e cila pranoi kërkesën e autoriteteve shqiptare. Prej asaj kohe ai po qëndron në paraburgimin e Tiranës, në pritje për tu përballur me drejtësinë shqiptare.
Nga ana tjetër, britanikët dyshohet se kanë qenë informatorë, ata kanë qëndruar pikërisht në resortin në pronësi të biznesmenit Ardian Nikulaj dhe sipas hetuesve, ata kanë vëzhguar për ditë me radhë lëvizjet e tij dhe të stafit, të cilat më pas ia raportonin portugezit Ruben Saraiva.
j.l./ dita
