Prokuroria e Durrësit ka përfunduar hetimet dhe ka dorëzuar për gjykim dosjen penale për Hysen, Hygerta dhe Amarildo Metën, të akuzuar për vrasjen e kryefamiljarit Pëllumb Meta në një ngjarje tragjike që ka tronditur opinionin publik.
Sipas akuzës, Hygerta dhe Hysen Meta përballen me akuzën e vrasjes me paramendim, ndërsa Amarildo Meta akuzohet për asgjësimin e kufomës. Krimi ndodhi më 10 shkurt, por u zbulua nga policia më 22 shkurt, pasi Hysen Meta raportoi zhdukjen e babait të tij.
Trupi i Pëllumb Metës, 51 vjeç, u gjet i groposur pranë shtëpisë së familjes në Shënavlash të Durrësit. Fillimisht, Hysen Meta pranoi autorësinë e krimit, por gjatë dëshmive të mëvonshme, ai e mohoi përfshirjen. Në vijim, autorësinë e ngjarjes e mori e motra, 19-vjeçarja Hygerta Meta, e cila pretendoi se kishte vrarë të atin pasi ai kishte tentuar ta fejonte kundër dëshirës së saj.
Hetimet zbuluan se pas vrasjes, të tre të rinjtë e groposën trupin e viktimës në një stallë bagëtish pranë banesës. Policia kishte nisur kërkimet pas denoncimit të Hysen Metës për zhdukjen e të atit dhe gjetjes së automjetit të tij në zonën e quajtur “Sektori Rinia”.
Gjykata e Durrësit pritet të shqyrtojë këtë çështje të ndërlikuar, ndërsa motivet e plota të krimit mbeten ende të paqarta.
i.b./dita
