Detaje të reja janë zbardhur nga ngjarja e rëndë e një dite më parë në Tepelënë, ku dhe u vra biznesmeni italian, Edoardo Sarchi.
44-vjeçari është qëlluar teksa po levizte me makinën e tij. Sakaq, nuk dihet ende me cilën armë është qëlluar, por janë dërguar për ekspertizë dy armët e gjahut që do përdoreshin nga viktima së bashku me të shoqëruarit që kishin dalë për këtë aktivitet në natyrë.
Nga ana tjetër, blutë kanë liruar katër personat e shoqëruar lidhur me ngjarjen, pasi u morën në pyetje për më shumë se 12 orë, duke mos dalë në një konkluzion të vetëm.
Nga dëshmia e tyre, zbulohet se të shoqëruarit janë shprehur se janë qëlluar nga një person tjetër, por në vendngjarje nuk u gjetën gëzhoja.
Sakaq, një person nga Vlora, është shpallur në kërkim pasi dyshohet të ketë lidhje me ngjarjen, por nuk dihet roli i tij.
Viktima ishte qëlluar në këmbë, e për shkak të gjakderdhjes së tepërt ka humbur jetën.
Kujtojmë se ngjarja e rëndë ndodhi në fshatin Salari, ndërsa rreth orës 00:30, në vendin e quajtur “Dilan”, është gjetur trupi i pajetë i biznesmenit italian Edoardo Sarchi.
Sipas shenjave në vendin e ngjarjes, mendohet se trupi i viktimës është zvarritur dhe nxjerrë në anën tjetër të rrugës.
Zona ku ka ndodhur ngjarja është një zonë mjaft e frekuntuar. Biznesmeni italian Edoardo Sarchi jetonte prej 20 vitesh në Tiranë dhe shpesh shkonte në Salari të Tepelenës për shkak të pasionit të tij për gjuetinë.
j.l./ dita
