Prokuroria e Elbasanit ka ngritur akuzë edhe ndaj Indrit Shaqjas, personit që mbeti i plagosur nga të shtënat në burgun e Peqinit. Pas ngritjes së akuzës nga Prokuroria, Shaqja është arrestuar nga oficerët e policisë gjyqsore.
Ai dyshohet se bashkëpunoi me Sokol Mjacajn për vrasjen e Arben Lleshit. Sipas prokurorisë, po verifikohet përfshirja e tij në këtë ngjarje pasi i është gjetur një celular në burg.
Autoritetet kanë kontrolluar sërish vendin ku u vra viktima, që përkon me dhomën e të dënuarit Indrit Shaqja. Celulari që u gjet në një arkë druri ushqimesh pas këqyrjes së imtësishme të sendeve që ndodheshin në dhomë, dhe që i përket Shaqjas, është sekuestruar nga autoritetet në cilësinë e provës materiale. Ndërkohë që në qeli u gjet edhe një predhë, e cila ishte nga ngjarja e vrasjes së viktimës Arben Lleshi.
Gjatë marrjes në pyetje, ai ka pranuar pronësinë e telefonit celular dhe në këto rrethana, është arrestuar nga policia gjyqësore e SHKBB. Në dëshminë e zbardhur një ditë më parë, Shaqja ka thënë se kishte marrë dy letra të shkruajtura me shkrim dore, për të kryer vrasjen e Arben Lleshit.
“Do të të paguajmë 200 mijë euro, do të sigurojmë edhe helmin që ti ta kryesh vrasjen e Arben Lleshit. Nëse je dakord na kthe përgjigje me letër”, ka thënë Shaqja. Sakaq, një ditë më parë, 11 nga 12 zyrtarët e burgut të sigurisë së lartë në Peqin u lanë në burg pa afat nga Gjykata e Elbasanit.
NJOFTIMI:
Në vijim të ngjarjes së datës 15.12.2023, nga Shërbimin i Kontrollit të Brendshëm në Sistemin e Burgjeve, më datë 19.12.2023, ora 21:00, u bë arrestimi në flagrancë i shtetasit, të dënuarit Indrit Shaqja, akomoduar në IEVP Peqin, për veprën penale “Futja dhe mbajtja e sendeve të ndaluara në Institucionet e Ekzekutimeve të Vendimeve Penale” parashikuar nga neni 324/a/2 të Kodit Penal.
Kjo pasi, nga kontrolli i ushtruar në dhomën e akomodimit në IEVP Peqin ju gjet 1 (një) aparat celularë i kamufluar në arkën e sendeve ushqimore i cili u sekuestrua.
Gjithashtu u gjet dhe 1 (një) predhë e cila ishte nga ngjarja e vrasjes së viktimës A.LL.
Materialet procedurale i kaluan Prokurorisë së Shkallës së Parë të Juridiksionit të Përgjithshëm Elbasan dhe po vijojnë hetimet me intensitet për të gjithë personat e përfshirë, deri në zbardhjen e plotë të ngjarjes së datës 15.12.2023.
p.k\dita
