Gjykata e Lartë ka lënë në fuqi dënimin me 30 vite burg për policin Ludjan Zaimi, pasi shkalla e tretë e gjyqësorit nuk pranoi rekursin e ish-efektivit, i cili kërkoi prishje të vendimit të dhënë nga Apeli i Posaçëm në 25 janar 2024. Zaimi u shpall fajtor për veprën penale të “vrasjes me paramendim e punonjësit të Policisë së Shtetit.
Ish-efektivi vrau me armë zjarri kolegun e tij Çaush Saliasi në 23 maj 2022 brenda ambienteve të komisariatit numër 3 në Tiranë pak para se dy oficerët e patrullës të përgjithshme të merrnin turnin. Ngjarja ndodhi për shkak të bullizimit dhe konflikteve të vazhdueshme mes efektivëve.
Zaimi në shkallën e parë u dënua me 35 vite burg për veprën penale “vrasje e punonjësve të policisë së shtetit”, por Apeli e rikualifikoi në vrasje me paramendim duke ulur 5 vite dënimin. Ish efektivi nuk u pajtua me këtë vendim dhe iu drejtua me rekurs Gjykatës së Lartë.
Si ndodhi ngjarja?
Ludjan Zaimi, efektivi që nuk duroi dot shakatë e talljet e kolegut të tij Çaush Saliasi dhe e vrau në derën e komisariatit numër tre. Për viktimën, Zaimi ka thënë se fillimisht ka pasur marrëdhënie shoqërore me të, por më pas janë konfliktuar. Ekspertiza mjekoligjore është parë e nevojshme pasi në banesën e Zaimit janë gjetur edhe medikamente.
Ai kurohej me antidepresantë “seroquel”, medikament që përdoret për të kuruar çrregullime dhe probleme të shëndetit mendor, si skizofrenia e çrregullime bipolare.
Gjykata doli në përfundimin se Zaimi e kishte planifikuar vrasjen e kolegut që shërbente për më shumë se 20 vjet në radhët e Policisë së Shtetit. Prej kohësh ai ankohej për daljen në shërbim me të, tregonte se Saliasi e bullizonte, e shante, e quante ‘qorr’ dhe nuk ia kursente as personat e familjes.
j.l./ dita
