Vuçiç u drejtohet serbëve: Na kanë vënë si kusht planin franko-gjerman

Sic kishte paralajmëruar, presidenti i Serbisë Aleksandër  Vuçiç ka dalë sonte në mbrëmje në në një konferencë për mediat ku ka njoftuar mbi rezultatet e takimit të fundjavës me diplomatët e një ekipi evropiano-amerikan mbi ecurinë e dialogut Kosovë-Serbi.

Vuçiç deklaroi se “nuk ka progres për vendin dhe prespektivën e tij evropiane”, nëse nuk bashkëpunohet për këtë çështje.

Presidenti serb tha ndër të tjera se kushti i diplomacisë evropiane dhe amerikane ishte i tillë që nëse nuk pranohet  plani franko-gjerman, Serbia do të përballet me ndalimin e integrimit evropian, ndalimin e investimeve dhe masat gjithëpërfshirëse në kuptimin politik dhe ekonomik.

“Duhet ta pranoni këtë plan, më thanë”, tha Vuçiç.

Vuçiç tha se i gjithë konteksti evropian ka ndryshuar pas sulmit të Rusisë ndaj Ukrainës.

“Serbia është në radarin e të gjithëve sepse nuk vendosi sanksione ndaj Rusisë”, tha ai. Ai tha se se ky fakt është bërë një nga problemet më të mëdha për Serbinë.

Më herët gjatë ditës, me ftesë të kryeministres, Ana Brnabiq, Vuçiç mori pjesë në mbledhjen e Qeverisë së Serbisë, e cila zgjati rreth dy orë dhe ishte e mbyllur për publikun. Pas takimit, u tha se presidenti serb njoftoi ministrat për qëndrimin e Beogradit zyrtar për çështjen e Kosovës, siç u tha, me “sfidat dhe vështirësitë me të cilat po përballet Serbia”.

Sipas njoftimit të Qeverisë serbe, në takim “u pajtuan që presidenti, qeveria dhe të gjitha autoritetet ekzekutive të punojnë në mënyrë të sinkronizuar dhe të unifikuar”.