Kreu i grupit Wagner, Yevgeny Prigozhin është varrosur me një ceremoni private funerali në Shën Petërburg, është shprehur zyra e tij e shtypit.
Ceremonia u mbajt në një “format të mbyllur” dhe “të gjithë ata që dëshirojnë t’i thonë lamtumirë mund të shkojnë në varrezën Porokhovskoye”.
Njoftimi i publikuar në “Telegram” nuk përmban detaje të tjera.
Prigozhin, 62 vjeç, u deklarua i vdekur nga autoritetet ruse pas analizës së ADN-së të 10 trupave të gjetur nga avioni i rrëzuar më 23 Gusht.
Kremlini ka mohuar akuzat se ka gisht në aksidentin ajror. Por shumë njerëz brenda dhe jashtë Rusisë e kanë përshkruar Prigozhin si “një i vdekur që ecën” pas aksionit të armatosur që udhëhoqi në muajin Qershor.
Zëdhënësi i Vladimir Putin, dha një deklaratë ku tha se Presidenti rus nuk do të merrte pjesë në funeralin e Prigozhin. Putin qëndroi në heshtje për 24 orë pas aksidentit. Ditën tjetër ai dërgoi ngushëllimet e tij për familjet e të gjitha viktimave.
