Policia e Mirditës ka sekuestruar 10 kilogramë kanabis në një fshat të Mirditës. Droga u gjet e groposur në një sipërfaqe pyjore në fshatin Simon, dhe nga hetimet, rezultoi se iu përkiste dy personave, kushërinj me njëri-tjetrin, të cilët u arrestuan me datë 1 Nëntor në kuadër të operacionit “Tempulli”. Ditën e arrestimit policia sekuestroi edhe 4.3 kilogramë drogë që iu gjeti dy kushërinjve.
Gjithashtu është arrestuar edhe një 41 vjeçar pasi në territorin përreth banesës së tij në fshatin Simon u gjetën të fshehura 1 kallashnikov dhe 2 karikatorë me fishekë luftarak, që posedoheshin nga ky person pa leje.
“Si rezultat i angazhimit maksimal të shërbimeve të Komisariatit të Policisë Mirditë, si dhe nga mbështetja e inteligjencës policore, kanë vijuar me intensitet megaoperacionet kombëtare “Sundimi i ligjit” dhe “Tempulli”, nëpërmjet të cilave janë goditur veprimtaritë kriminale të prodhimit dhe shitjes së lëndëve narkotike, si dhe të armëmbajtjes pa leje.
Gjatë episodeve të fundit të këtyre megaoperacioneve: u arrestua në flagrancë shtetasi Xh. Ç., 41 vjeç, pasi në territorin përreth banesës së këtij shtetasi, në fshatin Simon, Mirditë, u gjetën të fshehura 1 armë zjarri kallashnikov dhe 2 karikatorë me fishekë luftarak, që posedoheshin nga ky shtetas, pa leje.
U sekuestruan 10 kilogramë lëndë narkotike cannabis sativa, sasi e cila u gjet e groposur në një sipërfaqe pyjore, në fshatin Simon, Mirditë. Nga hetimet rezultoi se kjo lëndë narkotike iu përkiste shtetasve K. Ç. dhe P. Ç. (kushërinj), të arrestuar nga Policia, me datë 01.11.2023, në kuadër të megaoperacionit “Tempulli”, si bashkëposedues të 4.3 kilogramëve lënde narkotike cannabis sativa, sasi e cila u sekuestrua nga Policia, ditën e zhvillimit të megaoperacionit“, thuhet në njoftimin e policisë.
p.k\dita
