Shkencëtarët në Francë kanë zbuluar një depozitë të mundshme të hidrogjenit natyror, ose thënë ndryshe hidrogjenit të bardhë, në rajonin e Lorraine.
Përqendrimi i hidrogjenit në vendburim vlerësohet të jetë 14% në një thellësi prej 1.100 metrash.
Faza tjetër e kërkimit do të përfshijë shpimin e më shumë puseve për të konfirmuar madhësinë dhe shtrirjen e depozitimit.
- Publicitet -
Në nëntokën e këtij rajoni, fshihet asgjë më pak se furnizimi më i madh i njohur në botë i gazit deri më sot.
Deri më tani, shumica e zbulimeve të hidrogjenit të bardhë janë bërë rastësisht nga gjeologët në kërkim të lëndëve djegëse fosile.
Ekipi kishte vendosur të vlerësonte nivelin e gazit të metanit në nëntokën e Lorenës, për të bërë një vlerësim të sasisë totale të pranishme.
Por pas monitorimit kimik të shtresave shkëmbore dhe depozitimeve të metanit shoqërues, u zbulua prania e një përqindjeje të lartë e hidrogjenit. Përqendrimi i tij u rrit ndërsa zbritej, duke arritur në 20% në 1250 metra thellësi.
Nivele të tilla lënë të kuptohet se në 3 mijë metra nën tokë, përmbajtja e hidrogjenit mund të kalojë 90%.
Në bazë të të dhënave të deritanishme depozita e Lorenës mund të përmbajë deri në 46 milionë ton hidrogjen të bardhë, që do të thotë më shumë se gjysma e prodhimit aktual vjetor botëror të hidrogjenit gri.
“Ngjyrat” e hidrogjenit klasifikohen sipas procesit me të cilin ato prodhohen.
Hidrogjeni gri i referohet hidrogjenit të prodhuar në një fabrikë duke përpunuar gazin natyror. Aktualisht ai tërheq kritika për shkak të sasisë së CO2 të emetuar gjatë prodhimit.
Hidrogjeni i zi është bërë nga qymyri, ndërsa hidrogjeni jeshil vjen nga elektroliza e ujit duke përdorur energjinë elektrike të prodhuar nga burime të rinovueshme.
Të gjitha këto lloje të hidrogjenit janë ato që quhen forma dytësore të energjisë.
Hidrogjeni i bardhë, është hidrogjen i pranishëm në atë gjendje në natyrë. Prandaj është një burim primar shumë i pastër energjie.
Një furnizim i mundshëm drejtpërdrejt i disponueshëm me hidrogjen të bardhë ofron avantazhin e madh për të mos pasur nevojë për inpute shtesë të energjisë nga gaze/substanca të tjera.
Teoria aktuale pas zbulimit të fundit në Lorenë sugjeron një furnizim pothuajse pa limite prej këtij gazi.
Një sërë partnerësh tregtarë dhe institucionalë, francezë dhe ndërkombëtarë, janë interesuar tashmë për financimin e projektit.
