Një operacion antidrogë është zhvilluar ditën e sotme në Selitë ku u vendosën në pranga disa persona. Në një njoftim policia bën me dije se droga është gjetur në ambientet e një magazine të vjetër dykatëshe, në rrugën “Hamdi Pepa”.
Më tej bëhet me dije se bimët narkotike kultivoheshin me anë të llambave. Në fillim u raportua se magazina ishte shtetërore ndërsa policia ka sqaruar se objekti rezulton i privatizuar nga 3 persona. Gjithashtu në njoftim thuhet se në magazinë u gjetën të kultivuara në vazo plastike, 105 bimë të dyshuara narkotike Cannabis Sativa.
Njoftimi i Policisë:
Gjatë orëve të para të mëngjesit, shërbimet e Komisariatit të Policisë Nr. 2 kanë ndërhyrë në ambientet e një magazine të vjetër dykatëshe, në rrugën “Hamdi Pepa”, Selitë, ku nga informacionet e siguruara nga inteligjenca policore, dyshohej se kultivoheshin bimë narkotike, me anë të llambave.
Nga kontrollet, në katin e dytë të këtij objekti, i cili nga verifikimet rezulton i privatizuar nga shtetasit A. C., K. K. dhe V. S., shërbimet e Policisë gjetën të kultivuara në vazo plastike, 105 bimë të dyshuara narkotike Cannabis Sativa.
Për rastin janë shoqëruar në ambientet e Policisë, disa shtetas, ndërkaq një grup i posaçëm hetimor po punon në vendngjarje, për të zbardhur dhe dokumentuar ligjërisht, rrethanat. Në përfundim të veprimeve procedurale do të japim njoftim të detajuar për këtë rast.
j.l./ dita
