Forcat Mbrojtëse të Izraelit njoftojnë se armëpushimi i përkohshëm midis Izraelit dhe Hamasit është zgjatur edhe me një ditë. Kjo është zgjatja e dytë e armëpushimit fillestar katër-ditor që filloi të premten.
Armëpushimi ka rezultuar në kthimin e 70 izraelitëve sipas marrëveshjes.
Gjatë pauzës, 3 shtetas izraelitë me shtetësi të dyfishtë dhe 24 shtetas të huaj janë liruar gjithashtu jashtë marrëveshjes. Në këmbim, 210 palestinezë janë liruar nga burgjet izraelite.
Ndërkohë, Izraeli do të zgjasë armëpushimin për çdo ditë që Hamasi vazhdon të lirojë 10 pengje të gjallë. Mark Regev, një këshilltar i lartë i kryeministrit izraelit Benjamin Netanyahu, tha për CNN se qëndrimi i Izraelit për çdo zgjatje të pauzës humanitare në luftime është i qartë. Ka ende të paktën 140 pengje brenda Gazës.
Izraeli këto 24 orë ka liruar 30 të burgosur palestinezë. Lirimi erdhi pasi Hamasi liroi ditën e djeshme 16 pengje izraelitë dhe të huaj të mbajtur në Rripin e Gazës.
Sakaq në Jerusalem ka ndodhur një sulm me armë zjarri ku kanë mbetur të plagosur 6 persona.
Ngjarja ka ndodhur në stacionin e tramvajit, në bulevardin Weizman.
Raportohet se dy të plagosur janë në gjendje kritike. Ndërsa dy sulmuesit u vranë.
Sekretari amerikan i Shtetit, Antony Blinken, mbërriti në Tel Aviv të enjten ku pritet të takohet me udhëheqësit izraelitë për të diskutuar zgjatjen e armëpushimit të përkohshëm të Izraelit me militantët e Hamasit dhe shtimin e ndihmës humanitare për Rripin e Gazës. Kjo është vizita e tretë e zotit Blinken në rajon që nga sulmi vdekjeprurës i Hamasit në Izrael më 7 tetor.
Kryediplomati amerikan pritet të vizitojë edhe Bregun Perëndimor të pushtuar, ku ka të ngjarë të takohet udhëheqësin e autoritetit palestinez, Mahmud Abbas, tha një zyrtar palestinez. Diplomati i lartë amerikan pritet gjithashtu që të diskutojë edhe lidhur me ofensivën e afërt të Izraelit në Gazën jugore.
Shtetet e Bashkuara po i kërkojnë Izraelit që të tregohet shumë më i kujdesshëm për të mbrojtur civilët palestinezë dhe për të kufizuar dëmtimin e infrastrukturës në çdo ofensivë në jug, thanë zyrtarë të lartë amerikanë.
j.l./ dita
