Policia britanike kundër terrorizmit po udhëheq tani hetimin për një zjarr në nënstacionin elektrik që ka mbyllur aeroportin Heathrow të Londrës për të gjithë ditën e sotme mes pretendimeve se mund të jetë një sulm sabotazh rus i lidhur me fushatën përçarëse të Vladimir Putin, kështu shkruajnë disa media britanike, ndër to “Daily Mail” dhe “Telegraph”.
Më shumë se 1,300 fluturime për dhe nga aeroporti më i ngarkuar i Mbretërisë së Bashkuar do të ndikohen sot për shkak të mbylljes së tij pas një zjarri në nënstacionin elektrik aty pranë North Hyde.
Mijëra shtëpi mbetën pa energji dhe më shumë se 100 njerëz u evakuuan pasi një transformator në nënstacion mori flakë ndërsa u dëgjua një shpërthim i madh.
Zyrtarët perëndimorë kanë akuzuar Rusinë dhe përfaqësuesit e saj për organizimin e dhjetëra sulmeve dhe incidenteve të tjera në të gjithë Evropën që nga pushtimi i Ukrainës tre vjet më parë.
Ata pretendojnë se fushata e destabilizimit është një zgjatje e luftës së presidentit Putin, që synon të mbjellë ndarje në shoqëritë evropiane dhe të minojë mbështetjen për Ukrainën, megjithëse Kremlini ka mohuar kryerjen e përpjekjeve sabotuese kundër Perëndimit.
Në fillim të kësaj jave, Putin kishte rënë dakord për një armëpushim të kufizuar që ndalon Rusinë të synojë infrastrukturën energjetike të Ukrainës pas një telefonate me Presidentin e SHBA Donald Trump.
Tani, ekspertët po analizojnë nëse Rusia mund të jetë e lidhur me zjarrin e nënstacionit në Mbretërinë e Bashkuar, i cili po prek 679 fluturime të planifikuara për ulje dhe 678 nisje nga Heathrow.
Komanda Kundër Terrorizmit e Scotland Yard po udhëheq hetimin duke pasur parasysh nevojën për të përcaktuar shpejt nëse ka të bëjë me sabotim dhe pyetjet e sigurisë në lidhje me mënyrën se si një zjarr shkatërroi një pjesë të madhe të infrastrukturës.
j.l./ dita
