Zjarri në Mallakastër ka dalë jashtë kontrollit, ndërsa po digjen masive të mbjella me pisha.
Situata në fshatrat Riban dhe Ngraçan vijon të jetë e rëndë, pasi zjarri i rënë dy ditë më parë mori përmasa të mëdha në orët e mbrëmjes së sotme.
Edhe pse në vendin e ngjarjes ndodhen forca të shumta zjarrfikëse, banorë dhe forca të ushtrisë, flakët janë tepër të mëdha për t’u vendosur nën kontroll.
Autoritetet deklarojnë se po punohet intensivisht për të parandaluar përhapjen e flakëve drejt zonave të banuara.
Kryetari i Bashkisë së Mallakastrës Qerim Ismailaj, në lidhje me situatën e flakëve deklaroi për mediat se vatra e zjarrit është zgjeruar, pavarësisht se ka pasur helikopterë në ndihmë për shuarjen e flakëve.
“Siç jeni në dijeni, vatra e zjarrit është zgjeruar, pavarësisht se ka pasur ndërhyrje nga zjarrfikësit dhe autoritetet shtetërore. Është një zonë, që favorizon përhapjen e flakëve. 110 forca kanë qenë sot në terren. Do punohet gjatë natës, që të mbajmë zjarrin në vëzhgim, për të mos pasur problematika të caktuara. Nesër në orën 5 të mëngjesit do ndërhyhet nga ajri, që të izolohen zjarret në zonë”, deklaroi Ismailaj.
Deputeti Klevis Jahaj u shpreh se situata nga zjarret në Mallakastër vijon që të jetë e rëndë. Shtoi se sot është punuar gjithë ditën në terren.
“Situata vazhdon që të jetë e rëndë, kemi vatra të reja, që vazhdojnë që të përhapen. Ka pasur edhe ndërhyrje nga ajri me helikopterë gjatë ditës së sotme. Ne do të jemi gjatë gjithë natës në terren. U bëj thirrje qytetarëve që të jenë vigjilentë për jetën e tyre apo pronën dhe të dëgjojnë udhëzimet e autoriteteve, kur të ketë nevojë për evakuuime të mundshme”, tha Jahaj.
Një tjetër vatër e aktivizuar mbrëmjen e sotme është në malin e gjerë në Gjirokastër. Zjarri paraqitet me përmasa të mëdha dhe rrezikon të përhapet në sipërfaqe të tjera.
Sipas autoriteteve vetëm në orët e fundit janë raportuar 14 vatra zjarri nga të cilat 7 janë aktive Dajt, Mallakastër, Elbasan, Libohovë, Dropull, Selenicë dhe Skrapar. Në të gjitha vatrat e tjera operacionet vijojnë, ndërsa nuk raportohet rrezik për banesat.
