Sergio Busquets, një nga lojtarët më të mirë që ka përfaqësuar ndonjëherë klubin, do të largohet nga Barcelona në fund të sezonit.
Mesfushori i Barçës njoftoi vendimin e tij këtë të mërkurë përmes mediave sociale në një video emocionuese.
Kapiteni i skuadrës katalane do ta vazhdojë karrierën diku tjetër pas datës 30 qershor kur t’i përfundojë edhe kontrata me klubin ku u rrit dhe arriti të fitonte 4 Champions League e 8 tituj La Liga.
Nëpërmjet një mesazhi në rrjetet siociale, Busquets shkruan: “Gjithmonë kam ëndërruar të luaj me këtë fanellë dhe në këtë stadium e në realitet kam tejkaluar gjithçka që mund të ëndërroja. Kush do ta kishte menduar që kur erdha në fillim, do të luaja 15 sezone me më shumë se 700 ndeshje? Ka qenë një nder, një ëndërr, një krenari. Megjithëse nuk ishte një vendim i lehtë, mendoj se ka ardhur koha të largohem dhe dua të falenderoj të gjithë njerëzit që kanë bërë të mundur përjetimin e gjithë kësaj aventure, nga dita e parë deri në të fundit”.
Busquets e filloi karrierën e tij si futbollist në akademinë e Barcelonës në vitin 2005. Në fillim ai luajti në skuadrën e dytë të Barcelonës, por në vitin 2008 u grumbullua në ekipin e parë. Që nga ajo kohë, ai është bërë një pjesë e rëndësishme e klubit. Gjatë këtij sezoni ai numëron 27 ndeshje me më shumë se 2 mijë minuta në total ndërsa me shumë mundësi do të largohet me një titull tjetër pasi Barcelona kryeson bindshëm 5 javë nga fundit. Në La Liga ai numëron 478 ndeshje në total me 11 gola dhe 35 asiste.
p.k\dita