Në konferencën shkencore me rastin e 100-vjetorit të Bankës së Shqipërisë këtë të martë, guvernatori Gent Sejko foli për sfidat që po përballet ekonomia shqiptare dhe sistemi financiar, duke i ndarë ato në tre drejtime kryesore.
“Sfida e parë është rritja e tensioneve gjeopolitike në ambientin e huaj. Rritja e barrierave tregtare dhe kufizimet në lëvizjen e kapitalit përbëjnë një realitet të ri ekonomik, i cili ndikon drejtpërdrejt në ekonomitë e vogla si e jona”, tha Sejko.
Megjithatë, sipas tij, ndikimi i këtyre zhvillimeve mund të zbutet falë proceseve integruese me Bashkimin Europian.
“Rreziqet që vijnë nga këto sfida tejkalohen si në cilësi, ashtu edhe në sasi, nga oportunitetet që ofron procesi i anëtarësimit në BE”, tha Sejko.
Guvernatori ndaloi edhe tek sfida e dytë, që lidhet me inovacionin e shpejtë financiar.
“Gjatë dekadës së fundit, jemi bërë dëshmitarë të një revolucioni të shpejtë financiar, i cili ka potencialin të transformojë këtë industri. Dixhitalizimi i sistemit të pagesave dhe përdorimi i teknologjisë sjellin përfitime të mëdha, por njëkohësisht edhe rreziqe që duhet të adresohen me kujdes”, tha Sejko.
Sa i përket sfidës së tretë, Sejko theksoi se ajo lidhet me stadin e zhvillimit të Shqipërisë si një vend me të ardhura të mesme.
“Shqipëria është e ekspozuar ndaj një konkurrence më të fortë për kapital dhe fuqi punëtore në tregun evropian. Për të përballuar këtë, vendit i duhet të mbështesë modelin e zhvillimit tek rritja e produktivitetit dhe avantazhet e tij krahasuese”, tha Sejko.
Ai shtoi se trendet demografike aktuale përbëjnë një sfidë shtesë.
“Në kushtet e një popullsie që plaket dhe emigracionit të lartë, ne përballemi me mungesë të fuqisë punëtore të kualifikuar, gjë që e bën këtë sfidë edhe më komplekse”, tha guvernatori.
Në përfundim, Sejko nënvizoi se pavarësisht vështirësive, oportunitetet që ofron procesi i integrimit në BE mbeten të mëdha dhe vendimtare për zhvillimin afatgjatë të ekonomisë shqiptare.
j.l./ dita
