Në 24 orët e fundit, duke nisur nga mbrëmja e djeshme ku rreth orës 22.37 u regjistrua një tërmet me magnitudë 4,7 i shkallës rihter, janë shënuar afro 30 lëkundje me magnitudë 2, të shkallës rihter, pa shkaktuar dëme.
Sipas sizmiologëve, epiqendra e tërmetit u regjistrua në fshatin Xibër të Klosit, 24 kilometra nga kryeqyteti.
Lëkundjet e fuqishme të tërmetit shkaktuan dëmtime të lehta në mbi 20 banesa në zonën e Klosit, ndërsa fatmirësisht, nuk pati raportime për persona të lënduar.
Tërmeti i parë, i cili u regjistrua në orën 22:37 të mbrëmjes së të dielës, fillimisht u raportua me magnitudë 5,24 rihter nga Qendra Europiane e Sizmologjisë, por më pas u saktësua në 4,7 i shkallës rihter.
Vetëm pak minuta nga tërmeti i fortë, një tjetër lëkundje me magnitudë 4,1 rihter.
Sizmologët thonë se zona do të jetë aktive për disa kohë deri në çlirimin e plotë të energjisë.
Këtë periudhë i gjithë rajoni është përfshirë nga një valë tërmetesh dhe sipas sizmologëve tashmë kemi hyrë në dhjetëvjeçarin me aktivitet të shtuar sizmik.
