Parlamenti Evropian mbështeti me shumicë dërrmuese nismën e rëndësishme për të lëvruar huanë prej 35 miliardë eurosh për Ukrainën, duke përdorur astetet e bllokuara të Bankës Qendrore të Rusisë si garanci për shlyerjen.
Plani kaloi me 518 vota pro, 56 kundër dhe 61 abstenim. Ligjvënësit e mbledhur në Strasburg ranë dakord të mos parashtronin amendamente me qëllim përshpejtimin e aprovimit përfundimtar në Këshill, ku ndihma ka marrë paraprakisht një dritë të gjelbër.
“Ky është një moment historik. Ne po dërgojmë mesazhin e fortë se po përdorim përfitimet nga asetet e ngrira ruse për Ukrainën dhe Rusia, si një agresor, duhet të paguajë për shkatërrimin”, deklaroi kryetarja e Parlamentit Evropian, Roberta Metsola.
Huaja e propozuar mori mbështetjen edhe të shumë ligjvënësve të së djathtës ekstreme që zakonisht është e prirur për të kundërshtuar asistencën ushtarake dhe financiare për Ukrainën.
Mbi 20 euro-deputetë të grupit ekstremist Patriotët për Evropën votuan në favor të ndihmës, ndërsa rreth 40 të tjerë, përfshirë kryetarin Jordan Bardella, zgjodhën të abstenonin.
Bardella u takua me Zelenskyn javën e kaluar, kur presidenti ukrainas vizitoi selinë e Parlamentit Evropian.
Ndërkohë, vetëm 7 ekstremistë të tjerë votuan kundër draftit.
Shifrat tregojnë një kontrast modest krahasuar me rezolutën në mbështetje të Ukrainës që Patriotët rrëzuan në korrik.
Megjithatë, grupi Evropa e Kombeve Sovrane, më radikali në Parlamentin Evropian, riafirmoi qëndrimin e tij armiqësor dhe në unison votoi kundër ndihmës.
