Kryeministri Edi Rama e shoqëroi me batuta përgjigjen për pyetjen e gazetarëve se si sipas tij, duhet të funksionojë integrimi gradual në Bashkimin Europian.
Duke i quajtur vendet kandidate “7 fëmijët e Ursulës”, kryeministri tha se ato duhet të ulen në tryezën e BE-së ndërsa përmbushin kriteret, duke fituar të drejtat e anëtarësimit për çdo kapitull që mbyllin.
“7 fëmijët e Ursulës duhet të përmbushin çdo kriter, duhet të ndjekin rregullat për çdo kapitull dhe duhet t’i bëjnë ballë të gjithë procesit neurotik të makinerisë prej 35 mijë grash e burrash, që është makineria më burokratike që ka krijuar njerëzimi”, tha ai.
Mw tej kryeministri shtoi se:
“Ajo që duhet të ndryshojë është radha e veprimit: jo më parë 33 kapituj dhe më pas vendimi politik. Të 7 fëmijët, përfshirë Ukrainën, duhet të jenë në tryezë si fëmijët e Ursulës. Si fëmijë duhet të dëgjojnë babanë dhe nënën, Francën dhe Gjermaninë, pastaj tezen Itali dhe të tjerët. Por duhet të jenë rreth asaj tryeze, ndërkohë që përmbushin kriteret”.
Nw fund kryeministri tha se si duhet të veprohej.
“Çdo kapitull që përmbyllin i bën anëtarë brenda suazës së atij kapitulli. Nëse mbyll kapitullin për shkencën, për atë bëhesh anëtar dhe ke të njëjtat të drejta. Çdokush që duhet të marrë më shumë nga tryeza, i jep më shumë tryezës, por duhet të jenë të pranishëm”, u shpreh ai.
Ai u shpreh se vendi ynë është duke u përpjekur të bëhet pjesë e Bashkimit Europian, por se jo gjithçka po shkon siç duhet.
“Ne jemi jashtë klubit dhe përpiqemi të hyjmë në klub. Nga një anë ndihemi të inkurajuar nga ky moment i ri dhe nga kjo atmosferë e re që për fat të keq duhet të falenderojmë Putinin, por nga ana tjetër shohim ende që ka diçka që nuk shkon sepse po, ka shumë përpjekje që po bëhen, por është një Mario tjetër që me këmbëngulje na thotë gjërat nuk po shkojnë ashtu siç duhet. Kjo është si të dëgjosh një muzikë të mrekullueshme, por Titaniku nuk po merr kthesën dhe para nesh është një ajsberg”, tha ai mes të tjerash.
Më tej ai kritikoi se Ballkani perëndimor po lihet jashtë, edhe pse diplomacia tregon të kundërtën.
“Flasim për një Europë dhe një treg, por nga ana tjetër në një dokument të fortë, Ballkani Perëndimor nuk ishte aspak i përfshirë në të. Kjo duket sikur është një vendim luks të na lësh jashtë. Ajo që vë re është një prirje nacionaliste e shumë vendeve që duhet të ishin fari i BE. Kjo është dëshpëruese sepse ishim ne ata që ishim nacionalistët.
Dëshpëruese të shohësh të na zmbrapsin sepse ka disa që na kushtëzojnë. Dëshpëruese të shohësh qeveri të moderuara demokratike që nuk janë plotësisht në krye në lëvizje sepse politika për një BE më të fortë e të bashkuar kushtëzohet nga ekstremet”, vijoi ai.
Në fund ai paralajmëroi se BE duhet të ndryshonte dhe u shpreh optimist për të ardhmen e Shqipërisë:
“Nuk besoj se 2027 do të na presë lumturisht me kompetencën e vetos nëse nuk ndryshon brenda BE-së, nuk do të ketë vend në BE për ne nëse nuk ndryshon diçka brenda Unionin”.
j.l./ dita
