Sot lamtumira e fundit për Silvio Berlusconin. Ish-kryeministri italian, një zë i fortë i politikës botërore do të përcillet në banesën e fundit. Në orën 15:00 në Duomo të Milanos kremtohet varrimi shtetëror për ish-kryeministrin që vdiq dy ditë më parë në moshën 86-vjeçare. Ditë zie kombëtare dhe një javë ndërprerje e punës së Kuvendit.
Në ceremoni marrin pjesë personalitete të shumta, mes tyre dhe kryeministri Edi Rama.
Ndërkohë funerali shtetëror ka filluar. Arkivoli u përcoll para altarit kryesor nga Karabinierët me uniformë të plotë. Kremtimi liturgjik, i hapur nga Requiem, kryesohet nga Kryepeshkopi i Milanos Mario Delpini.
Në fund të predikimit të kryepeshkopit të Milanos, pati një duartrokitje të gjatë në turmën e pranishme në funeralin e Silvio Berlusconit. Fjalët e fundit të Imzot Delpinit ishin: “Silvio Berluskoni ishte burrë dhe tani takon Zotin”.
Në varrim të pranishëm Mattarella, Meloni, Orban dhe Emiri i Katarit
Për funeralin shtetëror të Silvio Berlusconit, autoritetet duhet të mbërrijnë në Duomo në Milano nga ora 14.30 deri në 15.00. Presidenti i Republikës italiane Sergio Mattarella dhe kryeministrja Giorgia Meloni priten me zyrtarë qeveritarë.
Ndër të tjera edhe sekretari i PD-së Elly Schlein, Matteo Renzi, Carlo Calenda, Paolo Gentiloni që përfaqësojnë Komisionin Evropian. Nuk janë bërë të ditur të gjithë emrat e liderëve ndërkombëtarë që do të marrin pjesë, për arsye sigurie, por duhet të jenë të pranishëm kryeministri hungarez Viktor Orban dhe emiri i Katarit Tamim bin Hamad Al Thani, ndër të tjerë.
2300 njerëz në Katedrale: 15 mijë në shesh
Rreth dy mijë persona do të hyjnë në Katedrale për funeralin shtetëror të Silvio Berlusconit, ndërsa sheshi ka një kapacitet prej rreth 15 mijë personash.
