Izraeli do të godasë strukturat ushtarake iraniane për të marrë hak për sulmin iranian me rreth 200 raketa të kryer në fillim të muajit.
Lajmin e bën të ditur “The Times of Israel”, që citon një funksionar të shërbimeve të sigurisë, sipas të cilit hakmarrja e shtetit hebre po afron.
Megjithatë, shkruan gazeta në edicionin e saj online, objektivat mund të ndryshojnë.
Vendimi është marrë pas një mbledhjeje që kryeministri Benjamin Netanyahu zhvilloi mbrëmjen e së martës me një grup ministrash, krerë të ushtrisë dhe të shërbimeve të inteligjencës, që zgjati plot 5 orë.
Ndërkohë, gjatë së mërkurës, Netanyahu ka zhvilluar një bisedë të planifikuar telefonike me presidentin amerikan Joe Biden, që ka zgjatur plot 50 minuta.
Detajet e bisedës nuk dihen ende, por aludohet që shefi i qeverisë izraelite ta ketë vënë në dijeni shefin e Shtëpisë së Bardhë mbi planet e tij.
Sipas burimit mediatik, në bisedë është përfshirë edhe zëvendës presidentja Kamala Harris, e cila është gjithashtu kandidate për presidente në zgjedhjet e nëntorit.
Herën e fundit që Biden dhe Netanyahu kishin qenë në kontakt ishte 21 gushti, sipas një njoftimi të Shtëpisë së Bardhë.
Biseda e së mërkurës vjen pak ditë pas deklaratës së presidentit amerikan se Shtetet e Bashkuara nuk do të mbështesnin një sulm ndaj impianteve bërthamore të Republikës Islamike.
i.b./dita
