Drejtori i ARRSH-së Evis Berberi, i pyetur për aksidentin tragjik tek rrethrrotullimi i TEG-ut tha se barrierat e sigurisë në atë rrethrrotullim ishin mbi normën e kërkuar. Sipas tij, shkak i aksidentit ka qenë shpejtësia e madhe e automjetit.
Kreu i ARRSH-së, tha se, nëse këndi i goditjes në barrierë është më i madh se 40 gradë, barriera e humbet fleksibilitetin e saj dhe nuk e kthen dot automjetin brenda rrugës.
“Fatmirësisht në atë moment në atë rrethrrotullim, kushdo mund të shkojë ta vërtetojë, barrierat e sigurisë janë mbi normën e kërkuar. Pra, nëse në projekte, në normat e kërkuara të qarkullimit rrugor dhe kodit rrugor, barrierat rrugore ishin një kategori më poshtë, ne i kemi vendosur një kategori akoma më të lartë se ç’ishte parashikuar. Por, barrierat rrugore kanë një parim”, tha drejtuesi i Autoritetit Rrugor Shqiptar.
Beriberi tha se kjo llogaritet për shkak të shpejtësisë së lëvizjes, forcës së energjisë kinetike që do të transformohet në energji statike, që do të mbaje kjo barrierë. Sipas tij, kjo përkthehet në një kategori, kemi kategori H2, H3, H4.
“Barrierat aty janë H4, pra që është më e larta e mundshme, edhe pse jemi në një qytet me lëvizshmëri shumë më të vogël, duke qenë se është mbikalim kemi vendosur standardin e një ure me një shpejtësi lëvizje shumë më të madhe. Barriera rrugore ka një problem, nuk është llogaritur asnjëherë që ti do shkosh në barrierat rrugore, do ngulesh drejtpërdrejtë 90 gradë dhe barriera rrugore do të të mbajë. Barriera rrugore është bërë e tillë që të të kthejë brenda në rrugë.
Pra ka një kënd goditje të caktuar, nëse është një kënd më i madh sesa diku më duket 40 gradë, këndi i goditjes. Automatikisht fillon dhe humbet fleksibilitetin e vet, sepse pritet. Ti ke shkuar me 150 km/h, edhe po të kishim vendosur një mur ne atje do të ishte shtypur makina.
Prandaj ne vendosim barrierat mbrojtëse. Të gjitha makinat e para viteve ’80 nuk deformoheshin, dhe dëmtimet i merrnin gjithmonë pasagjerët, atëherë ndodhi e njëjta gjë me barrierat, janë parashikuar që të godasësh, ato të deformohen dhe ti të kthehesh brenda për shkak të elasticitetit që kanë. Nuk ka barrierë rrugore që të mban me atë shpejtësi”, tha kreu i ARRSH-së.
m.b./dita
