Turqia është përfshirë nga një valë zemërimi dhe trazirash pas publikimit të një karikature të konsideruar blasfemuese nga revista satirike Leman, e cila në edicionin e saj të 26 qershorit shfaqte dy personazhe të quajtur Muhamed dhe Moisi (Musa).
Të hënën në mbrëmje, një grup protestuesish të zemëruar tentoi të hynte në zyrat e revistës në lagjen Beyoğlu të Stambollit, ndërsa policia ndërhyri për të siguruar zonën dhe për të parandaluar përshkallëzimin e situatës.
Ministra, organizata joqeveritare dhe qindra qytetarë kanë dënuar ashpër karikaturën, duke e quajtur një provokim të pahijshëm dhe një krim urrejtjeje. Ministri i Drejtësisë, Yılmaz Tunç, theksoi se nuk mund të tolerohet mungesa e respektit ndaj besimit, ndërsa ministri i Brendshëm, Ali Yerlikaya, premtoi se të gjithë autorët do të mbahen përgjegjës për “aktet imorale”.
Në rrjetet sociale, reagimet kanë qenë të shumta. Simpatizantë të besimit mysliman, drejtues të OJQ-ve dhe politikanë kanë bërë thirrje për hetim të plotë dhe ndëshkim të autorëve. Përfaqësuesi i Presidencës, Fahrettin Altun, e cilësoi publikimin si “një provokim të papranueshëm” dhe kërkoi ruajtjen e qetësisë publike.
Karikaturisti D.P. është i njohur për postimet e tij provokative në rrjete sociale, përfshirë thirrje të mëparshme për “kryengritje të armatosur”, ndërsa revista Leman ka pasur bashkëpunime të mëparshme me revistën franceze Charlie Hebdo, e famshme për botime të ngjashme që kanë shkaktuar protesta globale.
Në mbrëmjen e së martës, sërish protestues u mblodhën pranë redaksisë së Leman, duke brohoritur slogane fetare, ndërsa forcat speciale policore kishin ngritur barriera për të garantuar rendin. Masat e sigurisë vazhdojnë të jenë në fuqi edhe sot.
Në një tjetër zhvillim, politikanë të opozitës kryesore mbetën të heshtur, përveç ndonjë deklarate të vogël nga parti konservatore. Megjithatë, Ekrem İmamoğlu, ish-kryetar i bashkisë së Stambollit dhe figurë e njohur e Partisë Republikane Popullore (CHP), dënoi publikisht karikaturën përmes një postimi nga burgu ku ndodhet:
“Karikatura e Leman, që synonte të denonconte shtypjen në Gaza, në fakt theu zemrat e besimtarëve. Nuk duhet t’i hapim rrugë provokimeve që përçajnë popullin tonë. E kemi për detyrë të mbrojmë paqen publike dhe respektin për besimet”, u shpreh İmamoğlu.
Situata mbetet e tensionuar, ndërsa hetimet penale janë në vazhdim. Autoritetet kanë theksuar se çdo fjalë apo veprim që përçmon simbolet fetare mund të përbëjë shkelje penale në kuadër të ligjeve turke për “fyerje të vlerave fetare”, dhe kanë paralajmëruar për ndëshkime të ashpra për të gjithë të përfshirët.
i.b./dita
