Dolph Lundgren, i cili i dha jetë personazhit të paharrueshëm Ivan Drago në ekranin e madh në ‘Rocky IV’, ka bërë publike se vuan prej tetë vitesh nga kanceri.
Ai ka rrëfyer përvojën e tij të tmerrshme, me sëmundjen nga e cila është ende duke u rikuperuar.
Aktori suedez thotë se po e merr veten në intervistën e tij në ‘In Depth With Graham Bensinger’, në të cilën mori pjesë edhe e fejuara e tij, Emma Krokdal.
Aktori tregoi se si dhe kur mori vesh për diagnozën: “Më gjetën një tumor në veshkë dhe e hoqën këtu, në Los Anxhelos, në vitin 2015. Më vonë më bënë një biopsi dhe doli të ishte sërish kancerogjene”, tha ai.
Pas ndërhyrjes iu nënshtrua kontrolleve dhe gjithçka dukej se për pak kohë po shkonte mirë. Por në vitin 2020 gjithçka shkoi përsëri keq. Ai mendoi se ishte refluks acidi, por mjekët e paralajmëruan se kanceri ishte kthyer dhe këtë herë me më shumë forcë.
“E kuptova që ishte diçka serioze. Më thirri kirurgu dhe më tha: “Jo, tani është rritur. Është shumë i madh. Nuk mund ta heqim. Është si madhësia e një limoni” shpjegoi ai.
Në fakt, Lundgren rrëfeu se i dhanë dy deri në tre vjet jetë.
Emma Krokdal, nga ana e saj, zbuloi se nga Qendra Mjekësore Cedars-Sinai në Los Anxhelos u informuan se kanceri kishte kaluar nga mushkëritë dhe mëlçia dhe kishte arritur në stomakun, shtyllën kurrizore dhe veshkat.
Megjithatë, pavarësisht panoramës, Dolph Lundgren tha se ishte mirënjohës për jetën e tij: “Ajo që më ndodhi është se fillova të rishikoja jetën time dhe thashë me vete: Kam pasur një jetë të mirë. Kam jetuar si pesë jetë në një’ Ndoshta kjo është arsyeja pse e gjithë kjo nuk më hidhëroi”.
Pavarësisht të gjithave, ai është optimist. Disa teste treguan se një mutacion mund ta ndihmonte aktorin nëse ai ndiqte një trajtim të caktuar. Kanceri i tij është reduktuar me 90% dhe ai shpreson që indet e mbetura të hiqen në të ardhmen e afërt.
