Autoriteti Kombëtar i Ushqimit ka bërë publike të dhënat paraprake të hetimit në fabrikat e prodhimit dhe përpunimit të qumështit. Gjatë katër muajve, janë kryer 38 kontrolle zyrtare dhe janë vendosur 33 gjoba me vlerë totale 32.5 milionë lekë të vjetra.
Veprimet janë ndërmarrë nga Sektori i Monitorimit dhe Hetimit përgjatë periudhës Maj-Gusht 2023.
Në total nga kontrollet e strukturave të Autoritetit Kombëtar të Ushqimit janë bllokuar 28 ton produkte bulmeti të këtyre fabrikave/stabilimenteve të prodhimit dhe përpunimit të qumështit. Po ashtu, është plotësuar dokumentacioni dhe janë dorëzuar katër kallëzime në prokurori.
Sektori i Monitorimit dhe Hetimit gjatë kontrolleve ka vendosur dhe 18 masa administrative “Paralajmërim”, për subjekte që nuk kanë përmbushur të gjitha kërkesat e sigurisë ushqimore.
Ndërkohë, në këto fabrika të përpunimit të qumështit në vend janë marrë 36 monstra, të cilat janë dërguar për analiza laboratorike dhe në përfundim të rezultateve, në varësi të asaj se çfarë do të dalë, do të vendosen dhe masat përkatëse për subjektet.
