Ish-kryeministri italian, Giuliano Amato, në një intervistë pretendoi se një raketë e forcave ajrore franceze rrëzoi aksidentalisht një avion pasagjerësh mbi Detin Mesdhe në vitin 1980 në një përpjekje të dështuar për të vrarë liderin e atëhershëm të Libisë, Moammar Gadafi.
Ish-kryeministri i bëri thirrje presidentit francez Emmanuel Macron që ose të përgënjeshtrojë, ose të konfirmojë pohimin e tij për shkakun e rrëzimit të 27 qershorit 1980, i cili vrau të gjithë 81 personat në bordin e avionit, raporton AFP.
Amato tha se është i bindur se Franca goditi avionin ndërsa synonte një avion ushtarak libian.
Ndërsa pranoi se nuk kishte prova të forta, Amato pohoi gjithashtu se Italia informoi Gadafin dhe kështu ai, ndërsa po kthehej në Tripoli nga një takim në Jugosllavi, nuk hipi në avionin ushtarak libian.
Çfarë e shkaktoi përplasjen është një nga misteret më të mëdha të Italisë moderne. Disa thonë se një bombë shpërtheu në bordin e avionit Itavia në një fluturim nga Bolonja në Siçili, ndërsa të tjerë thonë se ekzaminimi i rrënojave, të nxjerra nga fundi i detit vite më vonë, tregon se ai ishte goditur nga një raketë.
Gjurmët e radarit treguan një stuhi të aktivitetit të avionëve në atë pjesë të qiellit kur avioni u rrëzua.
“Versioni më i besueshëm është ai i përgjegjësisë së forcave ajrore franceze, në bashkëpunim me amerikanët dhe që morën pjesë në një luftë në qiell atë mbrëmje të 27 qershorit”, citohet të ketë thënë Amato.
NATO planifikonte të “simulonte një stërvitje, me shumë avionë në veprim, gjatë së cilës supozohej të hidhej një raketë” me Gadafin si objektiv, tha Amato.
j.l./ dita
