PALMA, MAJORKË – Një incident i pazakontë ndodhi mbrëmjen e 4 korrikut në Aeroportin Ndërkombëtar të Palmës, ku një avion i kompanisë “Ryanair” që po përgatitej për t’u nisur drejt Mançesterit, u evakuua urgjentisht për shkak të një alarmi për zjarr.
Sipas autoriteteve spanjolle dhe raportimeve të mediave vendase, të paktën 18 persona u plagosën, nga të cilët gjashtë u dërguan në spital për trajtim mjekësor. Incidenti ndodhi në bord të fluturimit FR3446, i planifikuar të ngrihej në orën 22:50 të së enjtes.
Një video e publikuar në rrjetet sociale tregon pasagjerët që dalin nga avioni përmes krahut të majtë, duke kërcyer nga një lartësi prej afro tre metrash – një veprim i rrezikshëm që ndodhi pasi nuk funksionuan të gjitha rrëshqitëset e emergjencës, siç ndodh zakonisht në raste të tilla.
Zëdhënës të kompanisë ajrore Ryanair konfirmuan incidentin dhe sqaruan se “Një dritë alarmi për zjarr u ndez gabimisht dhe ekuipazhi vendosi të evakuojë pasagjerët për siguri maksimale. Evakuimi u krye përmes rrëshqitëses në derën e përparme të majtë. Disa pasagjerë u lënduan lehtë gjatë procesit. U ofrua menjëherë ndihmë mjekësore dhe u sigurua një avion zëvendësues, i cili u nis të nesërmen në orën 07:05.”
Nuk dihet ende pse nuk funksionuan rrëshqitëset e tjera të emergjencës, një element kyç në procedurat e sigurisë ajrore. Autoritetet e aviacionit në Spanjë kanë nisur një hetim zyrtar për të sqaruar shkaqet dhe për të vlerësuar reagimin e ekuipazhit dhe të kompanisë.
Pasagjerët e mbetur janë rikthyer në terminal, ndërsa kompania ka kërkuar ndjesë për vonesën dhe shqetësimin e shkaktuar.
