Ambasada e Shteteve të Bashkuara në Tiranë ka shpërndarë një postim të rëndësishëm lidhur me politikën e vizave, duke theksuar angazhimin e saj në mbrojtjen e sigurisë kombëtare të Amerikës dhe ruajtjen e standardeve të larta në procesin e dhënies së vizave.
Në postimin e saj, ambasada theksoi se, ndërsa ka për detyrë të mbrojë qytetarët amerikanë dhe sigurinë e shtetit, gjithashtu mirëpret dhe mbështet udhëtarët e ligjshëm që duan të vizitojnë SHBA-në.
Për këtë, ajo ka implementuar një sistem të avancuar kontrolli për aplikantët e vizave, i cili përshtatet me kërcënimet e reja të mundshme.
“Ne po mbrojmë Amerikën dhe mirëpresim udhëtarët e ligjshëm,” shkruan ambasada, duke shtuar se ky proces është i mbështetur në bashkëpunim të ngushtë ndërmjet agjencive të ndryshme të qeverisë amerikane, për t’u siguruar që çdo aplikim për vizë është i trajtuar në përputhje me ligjin dhe rregullat ndërkombëtare.
