I ngarkuari me punë, Luigi Soreca është takuar ditën e sotme me delegacionin e Bashkimit Europian dhe ka nisur menjëherë nga puna, deri në mbërritjen e ambasadori të ri.
Rikthimin në Tiranë, Soreca e ka cilësuar si një privilegj, nisur nga fakti që për Shqipërinë është një moment mjaft i rëndësishëm në rrugën e saj drejt familjes Europiane.
“Është një nder dhe një privilegj të jem përsëri në Tiranë në këtë moment veçanërisht të rëndësishëm për zgjerimin e BE-së dhe për procesin e integrimit të Shqipërisë në BE, dhe në të njëjtën kohë me Samitin e ardhshëm të Procesit të Berlinit në Tiranë. BE qëndron krah Shqipërisë për të konsoliduar progresin e arritur, thellimin e transformimit të vendit dhe shtyrjen për reforma të rëndësishme që do ta sjellin Shqipërinë në BE”, tha ambasadori.
Diplomati rimerr këtë post pas largimit të Christine Hohmann, e cila doli nga shërbimi diplomatik i Bashkimit Evropian, për t’u rikthyer si pjesë e diplomacisë së Berlinit zyrtar në Irak.
Eksperienca e tij ishte kyçe për rikthimin e tij në Tiranë, pasi Soreca ka shërbyer si ambasador në vendin tonë për tre vite e shtatë muaj. Ai erdhi në Tiranë në shtator të vitit 2018, për t’u larguar në prill të 2022.
p.k\dita
