Kryetari i Bashkisë së Divjakës, Josif Gorrea, ka dalë hapur kundër propozimit të Partisë Socialiste për Reformën e re Territoriale, i cili parashikon bashkimin e Bashkisë së Divjakës me atë të Lushnjës. Gjatë një proteste të zhvilluar së bashku me qytetarët, kryebashkiaku socialist u shpreh se lajmi për përfshirjen e Divjakës në listën e bashkive që do të shkrihen i ka ardhur si një “bombë”, duke theksuar se është ndjerë i tradhtuar nga mënyra se si është bërë publik ky propozim.
Gorrea deklaroi se diskutimet për një reformë të re territoriale kanë nisur prej kohësh, por varianti i prezantuar nuk përfaqëson një reformë të mirëfilltë dhe nuk bazohet në kritere të qarta e të drejta.
Ai theksoi se një nga kriteret kryesore të përmendura gjatë diskutimeve ka qenë numri i popullsisë, ndërsa pretendon se Bashkia e Divjakës nuk i plotëson kushtet për tu shkrirë me një njësi tjetër vendore. Sipas tij, Divjaka ka tregues që e justifikojnë vazhdimin e funksionimit si bashki më vete.
“Ju falenderoj që jeni pjesë e këtij tubimi, për këtë lajm që na ra si bombë. Mendova se fjalën këtu do ta mbanin vetë ata, por të gjithë kanë të drejtën e vet të flasin siç e ndiejnë. Edhe unë, si qytetar, si ju, jam vërtetë i çuditur, edhe pse duhej të isha më në dijeni për shkak të pozicionit politik që kam. Por dhe mua më ra si bombë kur pashë atje dhe Bashkinë Divjakë, si një nga bashkitë që do t’i bashkohej.
Unë mendoj se këtu jemi për një qëllim dhe qëllimi i përbashkët është që ta mbrojmë bashkinë tonë, e cila është e popullit të jashtëzakonshëm, më punëtor të republikës. Vendi ku punohet 365 ditë të viti. Të them të vërtetën, ndihem i tradhtuar, sepse pa asnjë paralajmërim na vjen kjo bombë. Në të vërtetë, kjo nismë e qeverisë ka kohë që përflitet. Komisioni i Reformës Territoriale në të dy krahët politikë ka shqyrtuar mundësitë se si ta vijojë këtë reformë, por, për fat të keq, ajo që ndodhi dje nuk mund të quhet reformë për mua. Pse?
Sepse parimi kryesor ishte numri i popullsisë dhe unë kam fjetur i qetë, pasi bashkia jonë ka 56 mijë banorë dhe në numrin rendor, në jemi 26. Pra, duhej të shkriheshin 27 bashki që të na vinte radha neve. Edhe sipas censusit, bashkia ka një numër të lartë banorësh që jetojnë dhe punojnë këtu. Janë 25 mijë banorë, dhe pse kemi dyshime për këtë. Por përsëri, numri 25 mijë që është i pranuar nga qeveria shqiptare dhe që është shumë e lartë”, tha Gorrea.
j.l./ dita
