Armëpushimi në Gaza ‘më afër se kurrë’, dalin detaje nga marrëveshja

Bisedimet në Doha për marrëveshjen e armëpushimit në Gaza dhe lirimin e pengjeve izraelite janë në “fazë përfundimtare”, thonë burime nga Katari.

BBC raporton se ka shenja se Izraeli dhe Hamasi mund të jenë në prag të arritjes së një marrëveshjeje armëpushimi, më shumë se 15 muaj pas fillimit të luftës në Gaza.

Bisedimet për të arritur marrëveshjen rifilluan këtë mëngjes në Doha, me ndërmjetësin kryesor të Katarit që tha se një marrëveshje ishte “shumë afër”

Një zyrtar i qeverisë izraelite i cili kërkoi të mbetet anonim tha se “progres i vërtetë” është bërë gjatë ditëve të fundit, por se marrëveshja “nuk është arritur ende”.

Udhëheqësi i Iniciativës Kombëtare Palestineze, një parti politike palestineze me bazë në Bregun Perëndimor, i tha BBC-së se ata besojnë se Hamasi e ka pranuar marrëveshjen.

Ndërkohë që një ekspert i ndërmjetësimit u shpreh se kryeministri izraelit do të frenojë arritjen e marrëveshjes deri më 20 janar – ditën kur Donald Trump do të betohet sërish si President i SHBA-së.

“Do të jetë dhurata e Netanyahut për presidentin e ri,” tha Oliver McTernan, drejtor i organizatës bamirëse për zgjidhjen e konflikteve Forward Thinking.

Lufta në Gaza u shkaktua nga sulmi i Hamasit në Izraelin jugor më 7 tetor 2023 , në të cilin rreth 1200 njerëz u vranë dhe 251 të tjerë u morën në Gaza si pengje.

Izraeli nisi një ofensivë ushtarake në Gaza si përgjigje, dhe ministria e shëndetësisë e enklavës e drejtuar nga Hamasi thotë se më shumë se 46,600 njerëz janë vrarë gjatë luftës.

i.b./dita