“Më futën vetë në grup, tani më sulmojnë”, flet gazetari i përfshirë në skandalin “Signal”: Nuk e kuptoj, pse qenkam i pandershëm?!

Jeffrey Goldberg, redaktor i “The Atlantic”, aksidentalisht u përfshi në një grup bisedash të aplikacionit Signal nga këshilltari për sigurinë kombëtare të SHBA, Michael Waltz.

Në këtë grup ishin të pranishëm figura kryesore të administratës Trump si Sekretari i Shtetit Marco Rubio, Sekretari i Mbrojtjes Pete Hegseth, drejtori i CIA John Ratcliffe dhe Drejtorja e Inteligjencës Kombëtare Tulsi Gabbard.

Aty diskutoheshin detaje të ndjeshme mbi një operacion të ardhshëm ushtarak në Jemen, duke përfshirë informacion mbi kohën dhe objektivat e sulmeve ushtarake.

Gjithçka filloi kur Goldberg mori një mesazh në Signal nga Waltz, të cilin e mendoi fillimisht si një gabim ose një shaka. Por më pas ai u fut në një bisedë të koduar ku u përshkruan detaje mbi lëvizjet ushtarake si oraret e avionëve F-18, kohët e lëshimit të bombave dhe përdorimin e raketave Tomahawk.

Waltz më vonë e pranoi gabimin dhe deklaroi se kishte përfshirë Goldberg aksidentalisht, por pretendoi se nuk e njihte atë personalisht – diçka që Goldberg e mohoi, duke thënë se ata janë takuar disa herë.

Incidenti ngjalli polemika të mëdha dhe administrata Trump u përpoq të diskreditonte Goldberg duke e sulmuar me epitete si “gënjeshtar” dhe “i pandershëm”.

Në fillim, Goldberg publikoi një histori për ngjarjen, duke shmangur detajet më specifike. Por pasi zyrtarët e administratës mohuan përfshirjen e të dhënave të ndjeshme, “The Atlantic” botoi të gjitha mesazhet e plota të grupit, duke përfshirë ato nga Hegseth, që përmbanin informacione mbi objektivat dhe taktikat e misionit.

Goldberg e kritikoi ashpër mënyrën se si janë trajtuar informacionet e ndjeshme, duke theksuar se një kapiten i forcave ajrore apo një zyrtar tjetër i zakonshëm që do të vepronte kështu, do të shkarkohej dhe përballej me pasoja ligjore.

Megjithatë, deri më tani Presidenti Trump ka mbrojtur ekipin e tij të sigurisë kombëtare, duke refuzuar të marrë masa ndëshkuese dhe duke e quajtur këtë një “gjueti shtrigash” nga shtypi.

Goldberg përshkruan incidentin duke dhënë një pamje surreale të mënyrës se si një mesazh i thjeshtë nga aplikacioni Signal u shndërrua në një bisedë në grup me rëndësi të lartë. Ai tregon se si, pa e kuptuar, u gjend me lidershipin e sigurisë kombëtare të SHBA-së, në një situatë që duket gati kinematike.

Ironia që ai u ftua në një bisedë kaq delikate dhe më pas u sulmua, ia shton dozën absurditetit. Ja si e përshkruan ai situatën:

“Ai më bëri ftesë, unë pranova. Dhe para se ta kuptoja, u gjenda në këtë grup diskutimesh shumë të çuditshme me lidershipin e sigurisë kombëtare të SHBA-së”.

“Kjo ishte lëvizje e tyre. E bënë vetë. Por ata nuk mbrohen kurrë, dinë vetëm të sulmojnë,” tha Goldberg.

“Isha në punën time. Më ftuan në këtë grup të Signal dhe tani më sulmojnë si njeri i pandershëm. Nuk e kuptoj fare.”

Ngjarja ka nxitur thirrje për hetime nga Kongresi dhe ka hapur diskutime mbi standardet e ndryshme të përgjegjshmërisë për liderët e lartë politikë në administratën Trump.

Për më tepër, Goldberg theksoi shqetësimin mbi përdorimin e Signal për të diskutuar çështje kaq të ndjeshme dhe mungesën e standardeve të sigurisë brenda grupit.

Në fund, Goldberg vendosi të largohej nga grupi për arsye etike dhe ligjore, edhe pse disa gazetarë e kritikuan për këtë vendim.

j.l./ dita