“Personi i tretë që ka qenë në makinë në momentin që u qëllua drejt makinës me të cilin udhëtonin Hamza Lici dhe Arlind Bushati, në Dobraç është Ibrahim Lici”.
Kështu është shprehur gazetari Poli Hoxha, i cili ndër të tjera tha se për këtë arsye janë duke u hetuar edhe efektivët e policisë, të cilët sipas tij e kanë lejuar atë që të largohet nga vendi ku ndodhi ngjarja.
“Deri tani si zhvillim është se po hetohen edhe policët që kanë lejuar largimin e një personi që dyshohet se mund të ketë qenë shënjestra. Nga të dhënat e mia ai është Ibrahim Lici.
Flitet se policia po hetohet se ka ndihmuar Licin për t’u larguar. Policia atje është e paaftë dhe me duar të lidhura përballë grupeve kriminale”, tha ai në emisionin ‘Studio Live’, në Report Tv.
Hoxha tha se tashmë duhet që të hetohet se cilët kanë qënë porositësit për atentatin që ndodhi në Shkodër, pasi autorët sipas tij tashmë janë vënë në kërkim.
“Për këtë ngjarje ne duhet që të mësojmë për porositësit, sepse për autorët janë shpallur dy persona në kërkim.
Ata kanë bërë akte dhune dhe shantazhe në qytetin e Shkodrës në mes të ditës.
Janë dy persona që janë të afërt me Bajrat dhe në këtë kuptim kemi një pistë. Është marr në pyetje Safet Bajri dhe besoj se do të merret në pyetje edhe vëllai i tij”, tha ai.
j.l./ dita
