Barometri i realizuar nga Datacentrum për Euronews Albania, tregon që arrestimi i Veliajt ka ndikuar tek perceptimi i votuesve të Partisë Socialiste për SPAK-un, duke ulur besueshmërinë e tyre tek kjo strukture me 7 pikë brenda një kohe të shkurtër, nga 83% në 74.9%.
Nga ana tjetër, gjetjet sugjerojnë se votuesit e PD-së kanë rritur vlerësimin pozitiv me 28% nga janari në shkurt.
Votuesit e Partisë Socialiste vijojnë të kenë besim tek SPAK, por gjithsesi, sondazhi tregon se besueshmëria ka rënë fort nga janari në shkurt.
Sipas Arbër Hitaj, gazetar i Report.tv, kjo rënie lidhet në përgjithësi me mosgoditjen e SPAK në radhët e opozitës.
“Mosgoditja ligjore e asnjë eksponenti të ish- qeverisjes para 2013 në përmasën që po goditet e majta ka ndikuar uljen e besueshmërinë në kahun e majtë,”tha Hitaj, ndërsa ngre pikëpyetje për mënyrën se si ndikon kjo besueshmëri e madhe e publikut tek vetë puna e SPAK.-ut.
“Sondazhet tregojnë se ka një qasje për drejtësi kolektive që kënaqet me arrestime dhe kjo është deri diku e justifikueshme, drejtësia ka munguar prej vitesh. Por a është kthyer ky besim në trysni e zell më të madh nga ana e hetuesve të SPAK për të tejkaluar procedurat dhe për të ushqyer këtë dëshirë” pyet Hitaj, ndërsa përgjigjet: “po, shenjat janë të qarta”.
n.s. / dita
