Bullgaria dhe Rumania do t’i bashkohen pjesërisht zonës Shengen nga fundi i marsit, njoftoi sot Këshilli i Bashkimit Evropian. 27 vendet anëtare të BE-së ranë dakord unanimisht për heqjen e kontrolleve kufitare ajrore dhe detare midis dy vendeve nga 31 mars 2024, sipas një njoftimi për shtyp.
Data specifike u zgjodh sepse korrespondon me kalimin nga linjat dimërore në ato të planifikuara për verën nga Shoqata Ndërkombëtare e Transportit Ajror (IATA), shkruajnë mediat e huaja.
Blloku me 27 vendet anëtare do të duhet të marrë një vendim të ri për të zgjedhur datën për heqjen e kontrolleve në kufijtë tokësorë të Rumanisë dhe Bullgarisë, deklaroi Këshilli i BE-së, organ që përfaqëson shtetet anëtare të BE-së.
Komisioni Evropian përshëndeti vendimin, i cili erdhi pas të paktën 12 vjet negociatash.
“Kjo shënon një moment historik për Bullgarinë dhe Rumaninë dhe një ditë krenarie të madhe për bullgarët dhe qytetarët rumunë,” tha presidentja e Komisionit Ursula von der Leyen. Komisioni rikujton se që nga viti 2011 ka konsideruar se këto dy vende ishin gati për t’u bashkuar me zonën Shengen.
Austria kishte vënë veton ndaj saj vitin e kaluar, duke protestuar për rritjen e numrit të emigrantëve të parregullt që mbërrinin në tokën e saj, përpara se të pranonte përfundimisht ta heqë atë në këmbim të garancive.
Sofja dhe Bukureshti ranë dakord të luftojnë imigracionin e paligjshëm më me vendosmëri në një deklaratë të përbashkët të nënshkruar të shtunën me qeverinë austriake. Në të njëjtën kohë, Bullgaria dhe Rumania u zotuan të zbatojnë plotësisht legjislacionin evropian, i cili përcakton se kërkesat për azil trajtohen në vendin e mbërritjes së emigrantëve.
Rumania dhe Bullgaria, anëtare të Bashkimit Evropian që nga viti 2007, nuk ishin pranuar në fund të vitit 2022 në këtë zonë të madhe, brenda së cilës 400 milionë njerëz mund të udhëtojnë lirshëm pa kontrolle të kufijve të brendshëm.
Zona Shengen për lëvizjen e lirë të njerëzve dhe mallrave u krijua në 1985 dhe përfshin 23 nga 27 shtetet anëtare të Bashkimit Evropian, si dhe Zvicrën, Norvegjinë, Islandën dhe Lihtenshtajnin.
j.l./ dita
