Komisionit Evropian i është kërkuar që të mbajë qëndrim ndaj Viktor Orban dhe të mos lejojë 10 miliardë euro të parashikuara për Budapestin, pasi kryeministri hungarez kërcënon të prishë planet e BE-së për anëtarësimin e Ukrainës në BE apo në lidhje me ndihmën ushtarake.
Lëvizjet e qeverisë hungareze në vitet e fundit për të minuar institucionet e pavarura, si dhe shqetësimet rreth korrupsionit dhe keqpërdorimit të supozuar të fondeve evropiane, kanë bërë që Brukseli të mbajë të bllokuara mbi 27 miliardë euro të destinuara për Hungarinë. Megjithatë, komisioni ka sinjalizuar se mund të akordojë deri në 10 miliardë euro, “gjoja” për shkak të përparimit të bërë në reformat në drejtësi, shkruajnë mediat e huaja.
Daniel Freund, një anëtar gjerman i Gjelbër i Parlamentit Evropian dhe kritik i qeverisë së Orbanit, i kërkoi BE-së të hënën që të mos e lërë Hungarinë pa e vënë para përgjegjësisë.
“Qeveria Orban nuk përmbushi reformat e nevojshme. Asnjë para nuk duhet të jepet. Nëse komisioni vendos ndryshe, kjo është vetëm për një arsye: ata po përpiqen të qetësojnë Orbanin, i cili e teproi plotësisht me kërcënimin e tij të vetos”, tha ai.
Për të pasur akses në fonde, Hungaria duhe të përfundojë një sërë reformash në fusha të tilla si pavarësia e gjyqësorit, transparenca dhe lufta kundër korrupsionit.
Kjo kërkesë vjen përpara një takimi të liderëve evropianë të planifikuar për në 14 dhjetor, kur 27 krerët e qeverive të BE-së kanë planifikuar të diskutojnë një paketë ndihme të propozuar prej 50 miliardë eurosh për Ukrainën, ndryshimet në buxhetin e bllokut dhe nëse duhet apo jo drita jeshile për hapjen e bisedimeve të pranimit me Kiev.
Udhëheqja e Hungarisë ka kërcënuar vazhdimisht se do të bllokojë vendimet për të tre çështjet.
j.l./ dita
