SHBA konfirmon se Ukraina do të marrë avionët luftarakë F-16. “Ukraina do të marrë avionët luftarakë F-16 , por dorëzimi i tyre do të zgjasë disa muaj,” tha Sekretari amerikan i Shtetit Antony Blinken në një intervistë për CNN.
Sekretari amerikan i Shtetit, Antony Blinken, ka thënë se Ukraina ka rimarrë rreth 50 për qind të territorit që ka zaptuar Rusia, ndonëse kundërofensiva e Kievit do të zgjasë disa muaj. “Ajo tashmë ka rimarrë rreth 50 për qind të asaj që ishte zaptuar”, ka thënë Blinken në një intervistë për rrjetin televiziv CNN. “Këto janë ditë relativisht të hershme të kundër-ofensivës. Është e vështirë”, ka thënë ai.
“Nuk do të përfundojë për një javë apo dy. Ne presim [që kundërofensiva të zgjasë] disa muaj”, është shprehur Blinken. Komentet e kryediplomatit të Shteteve të Bashkuara të Amerikës erdhën pak orë pasi presidenti i Rusisë, Vladimir Putin, tha se kundërofensiva e Ukrainës “ka dështuar”.
25 ndërtesa historike janë shkatërruar nga raketat e hedhura në Kiev e Odessa nga rusët. Lajmin e bën të ditur guvernatori i Odessës në Telegram.
“Sulmet gjatë natës dëmtuan 25 ndërtesa historike, rusët qëllimisht i drejtuan raketat e tyre në qendrën historike të Odessa, një vend i trashëgimisë së UNESCO-s. Gjithçka e krijuar nga arkitektë të mëdhenj tani po shkatërrohet nga perversët cinikë,” tha Guvernatori i Odessa, Oleg Kiper në Telegram
