Udhëheqësit e BE-së janë rikthyer në Bruksel për një përballje të dytë me kryeministrin e Hungarisë, Viktor Orban lidhur me refuzimin e tij për të miratuar një paketë të re ndihme prej 50 miliardë eurosh për Ukrainën.
Zhgënjimi dhe zemërimi mbizotëroi në kryeqytetin belg ndërsa udhëheqësit mbërritën për darkë mbrëmjen e të mërkurës në prag të samitit, me ndihmësit që ankoheshin për dështimin e kryeministrit hungarez për të ndryshuar pozicionin që nga dhjetori, kur ai bllokoi për herë të parë fondet.
“Ne jemi vërtet në një udhëkryq”, tha një zyrtar i BE-së, shkruan The Guardian.
Diplomatët në Bruksel theksojnë se Ukrainës nuk do t’i mbarojnë fondet për pajisje ushtarake dhe municione, pasi kjo vjen përmes shteteve anëtare individuale përmes Mjetit Evropian të Paqes. Por ata janë të shqetësuar për likuiditetin në ekonominë ukrainase dhe sinjalin që mungesa e unitetit do t’i japë Putinit.
Ky fond i BE-së, i kombinuar me mbështetjen e Fondit Monetar Ndërkombëtar dhe Bankës Evropiane për Rindërtim dhe Zhvillim, ka lejuar që në të kaluarën të paguhen pagat e mësuesve, mjekëve dhe ushtarëve, të vazhdojnë punën makinat e parave dhe ndërtesat të rindërtohen aty ku është e mundur.
Përpjekjet për të bindur Orbanin të ndryshojë mendje janë dyfishuar në 24 orët e fundit, me përfaqësuesit e 26 shteteve të tjera të BE-së që ranë dakord të fusin një paragraf kompromisi në projekt-tekstin e marrëveshjes që kërkohet në samitin për buxhetin.
Ditët e fundit Hungaria tha se do të heqë veton e saj, por vetëm nëse buxheti rishikohet çdo vit të periudhës katërvjeçare të financimit.
j.l./ dita
