Një grua 36-vjeçare, e cila ishte mbyllur në një varr në një varrezë në shtetin Minas Gerais, në Brazil, u gjet e gjallë pasi kishte përjetuar një torturë të papërshkrueshme për gati dhjetë orë.
Alarmi u ngrit të martën nga punonjësit e varrezave komunale të Visconde do Rio Branco, të cilët panë gjurmë gjaku pranë një varri. Dhoma ishte mbyllur së fundmi me tulla dhe çimento, tha policia lokale në një deklaratë.
Punonjësit e policisë kanë dëgjuar thirrje për ndihmë (nga brenda zonës), kanë thyer murin dhe kanë nxjerrë jashtë një grua të plagosur në kokë dhe në duar”, thuhet në njoftim.
Autorët e varrosën të gjallë gruan në këtë varr, një strukturë që lejon që të vdekurit të varrosen në dhoma mbi nivelin e tokës. Policia beson se ajo kishte qenë e mbyllur aty që një natë më parë.
Dy të dyshuar të moshës 20 dhe 22 vjeç janë ende në kërkim nga autoritetet. Inspektori i policisë i ngarkuar me hetimin, Diego Candian Alves, tha se ka të ngjarë të ishte një rast “hakmarrjeje” nga anëtarët e një bande aktive në kontrabandën e armëve dhe drogës.
Gruaja i tha policisë se dy persona të maskuar kanë hyrë në shtëpinë e saj dhe e kanë rrëmbyer pasi kanë rrahur burrin e saj. Ajo mbetet në spital, por gjendja e saj po “përmirësohet”, njoftoi uebfaqja e lajmeve G1, duke cituar burime mjekësore.
