Ndërsa lundronte nëpër ujërat e Cap de Formentor, një grup pushuesish nga Mallorca mori një surprizë: një peshkaqen i madh gri, me përmasa rreth dy metra iu afrua varkës së tyre. Ky nuk është një rast i izoluar, gjithnjë e më shumë peshkaqenë po i afrohen brigjeve spanjolle, siç ka alarmuar lexuesit e saj gazeta britanike ‘The Sun’. Në më pak se një javë, ky është peshkaqeni i tretë që është regjistruar pranë plazheve spanjolle.
Një grup peshkatarësh po lundronin në ujërat e Majorkës, pranë një destinacioni popullor pushimesh për britanikët. Kjo zonë njihet edhe për VIP-at që e vizitojnë çdo vit dhe është e mbipopulluar me pushues nga e gjithë bota. Megjithatë peshkaqenët s’i frikëson asgjë para erës dhe turfullimit të gjakut.
Në videon e regjistruar nga një prej pushuesve, shihet paniku kur një peshkaqen i madh iu afrua varkës, pranë portit të Pollença. Ndërsa u afrua, lundruesit e kuptuan se ishte një peshkaqen dhe ndaluan varkën për të hequr grepin që kishte në gojë. Ata madje prekën kafshën, e cila u zhyt përsëri në ujë dhe u largua nga anija. Një sjellje shumë e pazakontë, sepse normalisht ky lloj peshkaqeni gjendet në fund të oqeanit dhe nuk tenton të dalë në sipërfaqe.
Pas këtij episodi të fundit, gazeta britanike ‘The Sun’ ka alarmuar lexuesit e saj për praninë e peshkaqenëve në brigjet e Balearit, si dhe në ato të tjera spanjolle. Gazeta ka deklaruar se “peshaqenët duket se po lundrojnë jashtë Spanjës, por shkencëtarët janë plotësisht të hutuar se çfarë mund t’i tërheqë ata në breg”.
