Çfarë marrëveshje u nënshkua mes ministrit izraelit dhe Hoxhës?

Shqipëria dhe Izraeli kanë firmosur një marrëveshje ditën e sotme në Tiranë gjatë vizitës së Ministrit izaelit të Jashtëm Gideon Sa’ar. Përmblajtja e marrëveshjes është ende e paqartë. Nga qeveria shqiptare mungon si përherë transparenca, por diçka është zbuluar nga media izraelite.

Sipas burimeve thuhet se marrëveshja vendos një mekanizëm të strukturuar për zhvillimin e partneriteteve konkrete në fusha me interes të ndërsjellë, si ekonomia dhe tregtia, inovacioni dhe teknologjia, bujqësia, menaxhimi i ujërave, energjia, shëndetësia, arsimi, siguria, turizmi dhe kultura.

Megjithatë, ende nuk janë bërë publike hollësi mbi përmbajtjen e dokumenteve që do të nënshkruhen dhe angazhimet konkrete që do të marrë përsipër secila palë. Mungesa e informacionit lë të paqartë se cilat marrëveshje janë nënshkruar ditën e sotme dhe çfarë përfitimesh pritet të sjellin ato për Shqipërinë.

Disa detaje të marrëveshjes janë zbuluar nga televizioni izraelit Channel 14 . Në një raportim ai thekson se marrëveshja ndërqeveritare, e njohur si G2G (Government to Government), do të krijonte mundësi të reja për bizneset izraelite.

Sipas televizionit izraelit, kjo lëvizje pritet të forcojë ndjeshëm lidhjet ekonomike dhe të krijojë mundësi të shumta për kompanitë izraelite në sektorë kyç të ekonomisë shqiptare.

“Marrëveshja e re do t’i lejojë qeverisë shqiptare të angazhohet drejtpërdrejt me kompanitë kryesore izraelite në një sërë fushash. Ky veprim pritet të përparojë ndjeshëm lidhjet e biznesit dhe të hapë shumë mundësi për kompanitë izraelite në industri kyçe, duke përfshirë kibernetikën, inovacionin, teknologjitë e ujit, energjinë, kujdesin shëndetësor dhe bujqësinë e përparuar” thuhet në artikull.

Ndërsa media ‘Israel.fm‘ raporton se marrëveshja do t’i lejonte qeverisë shqiptare të kontraktonte drejtpërdrejt kompani izraelite, duke hapur mundësi tregtare në sektorët e teknologjisë, energjisë, ujit, shëndetësisë dhe bujqësisë.

Sipas mediave izraelite, kjo marrëveshje krijon mundësi konkrete për përfshirjen e kompanive private në projekte që mund të financohen nga qeveria shqiptare.

“Marrëveshja i lejon qeverisë shqiptare të lidhë kontrata direkte me firmat izraelite, duke hapur mundësi kyçe tregtare në fushën e kibernetikës, inovacionit, menaxhimit të ujit, energjisë, kujdesit shëndetësor dhe bujqësisë. Gjatë udhëtimit të tij, Sa’ar është planifikuar të zhvillojë takime dypalëshe të nivelit të lartë ”, thuhet në artikull.