Musa I ishte sundimtari i 9-të i Perandorisë Mali.
Mendohet se ka qenë personi më i pasur në histori.
Pasuritë e tij erdhën nga minierat e depozitave të jashtëzakonshme të arit dhe kripës në Perandorinë Mali, së bashku me tregtinë e skllevërve dhe fildishit.
Në historinë e njerëzimit besohet se pasuria e Musait e kalon atë të milionerëve modernë.
Disa përllogaritje thonë se pasuria e perandorit të vjetër afrikan është ekuivalentja moderne e rreth 400 miliardë dollarëve të sotëm.
Sipas rrjetit History.com, Musa e kishte ekspozuar masën e pasurisë gjatë një pelegrinazhi në Mekë, ku rrethohej nga mijëra ushtarë e skllevër që mbanin secili më vete sasi të mëdha floriri.
Udhëtimi i Musait dhe karvanit të tij për haxh në Mekë mendohet se ka ndodhur në vitin 1324.
Gjatë rrugës, ai kaloi kohë në Kajro.
Aty bëri dhurata aq të mëdha dhe aq të shumta sa ndikoi dukshëm në vlerën e arit në Egjipt.
Ky gjest tërhoqi vëmendjen e botës së gjerë myslimane të asaj kohe.
Raportimet thonë se bollëku uli vlerën e floririt dhe shkaktoi pasoja për disa vite me radhë në ekonominë e vendit.
Musai i Parë ndeshet në librat e historisë edhe si Mansa Musa,
E ndërsa Musa është forma arabe e emrit Moisiu, Mansa, do të thotë ‘sundimtar’ ose ‘mbret’ dhe ishte titulli që merrnin të gjithë sundimtarët e Perandorisë Mali.
Në traditën gojore dhe kronikat historike, Musa njihet si Kanku Musa.
Asokohe, ishte e zakonshme që emri i dikujt të para-shtesohej me emrin e nënës, kështu që emri Kanku Musa me gjasa do të thotë “Musai, djali i Kankusë”, por kjo mbetet e paqartë.
Mbretërimi i tij është i lidhur me projekte të shumta ndërtimi, por Musai vlerësohet gjithashtu për nxitjen dhe financimin e fesë islame, letërsisë dhe arsimit në vendin e tij.
Perandoria e atëhershme e Malit përbëhej nga territoret afrikane që sot janë pjesë e Guinesë, Senegalit, Mauritanisë, Gambias dhe Malit të sotëm.
m.b./dita