Miliona vota mbeten ende për t’u numëruar dhe është ende shpejt për të ditur pasojat e plota të zgjedhjeve të së martës, por ajo që është e qartë që tani është se amerikanët në shkallë të gjerë e kanë rrëzuar Trump-in dhe demokratët pritet të korrin një fitore të pazakontë.
“Demokratët morën kontrollin e Kongresit dhe po fitojnë garat për guvernatorë në mbarë vendin të martën. Ndërsa votat po numërohen në më shumë shtete kyçe, pyetja është se sa republikanë të tjerë do të fshihen nga skena. Në të gjithë hartën politike, zhvendosja drejt blusë ka qenë e jashtëzakonshme” – shkruan CNN.
Në zonat rurale të Amerikës Qendrore, marzhet e mëdha të fitores që Donald Trump arriti dy vite më parë janë shembur.
Në rrethet kongresionale me shumicë latino-amerikane, fitimet e presidentit të vitit 2024 kanë avulluar.
Megjithëse Shtëpia e Bardhë po përpiqet që tani të shmangë përgjegjësinë, ndërhyrjet e Trump në përpjekjet e partisë së tij për të ruajtur shumicën në Dhomën e Përfaqësuesve dhe në Senat duket se vetëm sa i kanë dëmtuar shanset e Partisë Republikane.
Përpjekjet e Trump për rekrutimin e kandidatëve dhe mbështetjen e tij janë kthyer në boomerang. Kandidatët që ai ka mbështetur përballë republikanëve të të tjerë kanë humbur ose kanë mbetur prapa në garat për Senat në Karolinën e Veriut, Xhorxhia, Teksas dhe Karolinën e Jugut.
Gjithashtu, taktika e tij me ridizajnimin e rretheve zgjedhore ka dështuar. Në Florida, demokratët fituan edhe rrethe që ishin riorganizuar me synimin për të garantuar fitoret e republikanëve.
Deri në Teksas, prej kohësh shteti i kuq më i madh i vendit, demokratët janë afër thyerjes së humbjeve disa-dekadshe, jo vetëm në garën për Senatin, por potencialisht edhe në garën për guvernator dhe garat e tjera në nivel shtetëror.
Sipas CNN
