Për shkak të zjarreve që kanë mbërthyer vendin në jug, Italia po shkon drejt shpalljes së gjendjes së jashtëzakonshme në shumë rajone.
Më shqetësuese situata paraqitet me zjarret që po shkrumbojnë vendin fqinj nga Siçilia në Palermo e Katania, deri në Taormina.
Mediat italiane shkruajnë se 6 persona kanë humbur jetën nga moti ekstrem në 24 orët e fundit, dhe për shkak të zjarreve të tmerrshme që ditët e fundit janë aktivizuar në shumë zona janë evakuuar gati 2 mijë banorë.
Vendimi për shpalljen e gjendjes së jashtëzakonshme pritet që të merret në mbledhjen e qeverisë. Ministri i Mbrojtjes Civile Nello Musumeci i cili ka patur kontakte telefonike me guvernatorët e qarqeve të Lombardisë, Sicilisë, Venetos, Emilia Romagna-s dhe Friuli Venezia Giulia-s, do të raportojë nesër në Këshillin e Ministrave për situatën.
Në mbledhje, mund të miratohet një dekret me rregulla për pushime për punëtorët e ndërtimit dhe bujqësisë, sektorët më të ekspozuar ndaj emergjencës së nxehtësisë dhe kushteve atmosferike në përgjithësi.
Ndërkohë, rajonet veriore të Italisë po përballen me rrymat e freskëta nga Evropa Veriore, të cilat kanë sjellë stuhi me shira të rrëmbyeshëm, e madje edhe tornado.
Në Milano, shpejtësia e erës arriti në 110 km në orë, duke shkatërruar çati shtëpish, rrëzuar pemë e bllokuar metro e hekurudha.
p.k\dita
